Çinli alimlər insanlara qaranlıqda və gözləri bağlı halda görmək imkanı verən innovativ kontakt linza hazırladıqlarını açıqlayıblar. Yeni texnologiya insan gözü üçün görünməyən infraqırmızı şüaları görünə bilən işığa çevirərək “göz qapalı görmə” dövrünü başlada bilər.

Sfera.az “NTV”yə istinadən xəbər verir ki, Çin Elm və Texnologiya Universitetindən professor Tian Xue və komandası tərəfindən hazırlanan linzalar, infraqırmızı şüaları qəbul edən nano hissəciklər vasitəsilə işləyir.

Bu hissəciklər, infraqırmızı şüanı qırmızı, yaşıl və mavi dalğa uzunluqlarına çevirərək insan gözünün onları görməsini təmin edir.

Digər gecə görmə cihazlarından fərqli olaraq, bu kontakt linzaların enerji mənbəyinə ehtiyacı yoxdur. Onlar elastik və şəffaf polimer materialdan hazırlanır və linzaların içində yerləşdirilən nano hissəciklər hesabına işləyir. Linzalar infraqırmızı işığı aşkar edib onu görünən rənglərə çevirir.

Tədqiqatın nəticələri “Cell” jurnalında dərc olunub. Alimlər bildirirlər ki, bu texnologiya yalnız qaranlıqda deyil, eyni zamanda dumanlı və tozlu mühitlərdə də effektiv ola bilər. Bunun səbəbi, infraqırmızı şüaların görünən işıqdan daha dərin nüfuzetmə qabiliyyətinə malik olmasıdır.

Araşdırma zamanı kontakt linzalar siçanlar üzərində sınaqdan keçirilib. Linza taxılmış siçanlar qaranlıqda infraqırmızı işıqla dolu bir mühiti seçə bilib, bu da onların yeni işıq növünü görə bildiklərini göstərib. Beyin fəaliyyətinin izlənməsi də bu nəticəni təsdiqləyib.

Hazırda texnologiyanın görüntü keyfiyyəti hələ tam ideal olmasa da, eyni prinsip əsasında işləyən və daha aydın görüntü təqdim edən xüsusi eynəklər də hazırlanıb.
Maraqlı məqamlardan biri də budur ki, linzalar gözlər bağlı olanda daha güclü effekt göstərir.

Bu texnologiyanın gələcəkdə rəng korluğu yaşayan şəxslərə kömək məqsədilə uyğunlaşdırılması da planlaşdırılır. Fərqli infraqırmızı dalğa boyları fərqli rənglərə çevrilərək normalda görünməyən tonların tanınmasına şərait yarada bilər.

Mütəxəssislər hesab edirlər ki, bu texnologiya gələcəkdə insan görmə imkanlarını tamamilə yeni bir mərhələyə daşıya bilər.

Bəsti Rəfizadə
Sfera.az

Çinlilərdən önəmli kəşf - Qaranlıqda da görmək mümkün olacaq