Bu qidalar insanı tez qocaldır - ARAŞDIRMA

Elmi araşdırmalara görə, hazır yeməklərin istehlakı insan orqanizmində bioloji qocalma prosesini sürətləndirir. Alimlər, qeyri-sağlam qidalanma vərdişlərinin hüceyrə səviyyəsində yaşlanma tempini artırdığını bildirirlər.

Sfera.az xarici mediaya istinadən xəbər verir ki, aparılan araşdırma nəticəsində məlum olub ki, meyvə-tərəvəz qəbulu az, lakin qırmızı ət, hazır yeməklər və şəkərli içkilər kimi məhsulları çox istifadə edən şəxslərdə bioloji yaş daha sürətlə artır.

Bioloji yaş insan hüceyrələrinin vəziyyətini əks etdirir və xronoloji yaşdan fərqli ola bilər.

Mütəxəssislər bildiriblər ki, bioloji yaş xəstəlik riski və həyat ömrü ilə daha sıx bağlıdır. Bu yaş, DNT-də baş verən kimyəvi dəyişiklikləri ölçən “epigenetik saatlar” vasitəsilə müəyyən olunur.

Araşdırma eyni genetik quruluşa malik əkizlər üzərində aparılıb. Nəticələr göstərib ki, eyni mühit şəraitində olsa belə, sağlam qidalanan fərdlərdə bioloji qocalma daha yavaş gedir. Bu isə o deməkdir ki, genetik faktorlarla yanaşı, həyat tərzi və qidalanma da qocalma prosesinə ciddi təsir göstərir.

Alimlər xüsusilə gənc yaşlardan etibarən sağlam qidalanma vərdişlərinin formalaşdırılmasının vacibliyini vurğulayır. Qeyri-sağlam qidalanma tərzi isə uzunmüddətli dövrdə ürək-damar xəstəlikləri, diabet və nevroloji problemlər kimi ciddi sağlamlıq risklərini artıra bilər.

Bəsti Rəfizadə