Ümumdünya Səhiyyə Təşkilatının məlumatına görə, dünyada 2,2 milyarddan çox insan yaxın və uzağı görmə problemi yaşayır. Son zamanlar Azərbaycanda da göz xəstəliklərindən əziyyət çəkənlərin sayı artıb.

Bəs göz xəstəliklərinin artmasına səbəb nədir?

Mövzu ilə bağlı Sfera.az-a danışan oftalmoloq həkim Fidan Ağayeva bildirib ki, göz xəstəlikləri ilə bağlı statistika bu sahədə ciddi artımın olduğunu göstərir:

"Ən çox rast gəlinən göz problemləri miyopiya (uzağı görməmək), hipermetropiya (yaxını görməmək), astiqmatizm və katarakta kimi xəstəliklərdir.Azərbaycanın böyük şəhərlərində, xüsusilə Bakı və Gəncədə gənclər arasında miyopiyanın yayılması artıb. Statistikaya görə, gənclər arasında bu xəstəlik 40%-ə qədər yayılıb.Astiqmatizm xəstəliyi də geniş yayılıb. Bu xəstəlik gözlərin qeyri-dəqiq fokuslanması, baş ağrısı və vizual narahatlıqlar yaradır. Statistikaya görə, bu xəstəlik 15-20% əhalidə müşahidə olunur.50 yaşdan yuxarı insanlarda katarakta (gözün şəffaflığını itirməsi) probleminin yayılma nisbəti 25%-ə qədər yüksəlir. Son illərdə bu xəstəliklə bağlı xəstəxanalara müraciət edənlərin də sayı artıb. 60 yaşdan yuxarı əhali arasında isə sarı ləkə xəstəliyi (makula degenerasiyası) daha geniş yayılıb.

Həkim qeyd edib ki, kompüter və mobil cihazlardan fasiləsiz istifadə gözlərin qurumasına və yorulmasına gətirib çıxarır:

"Yuxusuzluq və stress də görmə zəifliyinə səbəb olan amillərdən hesab olunur. Siqaret çəkmək və alkoqol qəbul etmək qan dövranının fəaliyyətini pozur.
Bu da gec-tez görmə pozğunluğunun yaranmasına səbəb olur. Azərbaycanda göz müayinəsi aparan şəxslərin sayı da artıb, amma hələ də mütəmadi müayinələr aşağı səviyyədədir. Statistikaya görə, əhalinin yalnız 20-25% hər il müntəzəm göz müayinələrindən keçir, bu da bir çox xəstəliklərin erkən mərhələdə aşkarlanmasını çətinləşdirir".

Ülkər Abdurahmanlı

Azərbaycanda bu xəstəlikdən əziyyət çəkən gənclərin sayı ARTIR - SƏBƏB NƏDİR?