Valideynlərin ən çox narahat olduğu və çəkindiyi mövzulardan biri də peyvənddir. Azərbaycanda əksər valideynlər övladlarını peyvənd etdirməkdən imtina edirlər.

Bəs peyvənddən imtinanın əsas səbəbləri nədir və peyvənd olunmayan uşaqların hansı viruslara yoluxma ehtimalı var?

Mövzu ilə bağlı Sfera.az-a danışan həkim pediatr Aygün Musayeva bildirib ki, valideynlərin bir qismi bunu ölkəyə gətirilən vaksinlərin aşağı keyfiyyətli olması ilə, digərləri isə uşaqların peyvəndlərə qarşı allergik reaksiyası ilə izah edir.

"Valideynlər uşaqda yaranan müəyyən narahatlıqları, xəstəlikləri iynədən sonrakı fəsad kimi qəbul edirlər. Ancaq uşaq xəstəliklərinin profilaktikasında önəmli yeri peyvəndlərin vaxtında və düzgün aparılması tutur. Bəzi valideynlər mənasız səbəblərdən uşaqları peyvənddən qaçırır və həmin uşaqlar peyvənddən qalmış olurlar”.

Həkim qeyd edib ki, erkən doğulmuş uşaqlar 2 kiloqramı keçdikdən sonra peyvənd olunmalıdır.

“Bəzi xəstəliklərdə, məsələn, allergiya, ürək xəstəliyi, xroniki ağciyər xəstəliyinin olması - bunların heç birində peyvənd əks göstəriş deyil. Peyvəndlərin vurulması bütün uşaqlara vacibdir. Heç bir peyvəndi saxlamağa ehtiyac yoxdur”.

Aygün Musayevanın sözlərinə görə, vaksinasiya müxtəlif xəstəliklərin qarşısını almaq üçün bədənə yeridilən anticisimlərdir:

“Bu zaman orqanizmdə passiv yolla immunitet yaradılır. Peyvənddən sonra uşaq hər hansı bir xəstəliyə yoluxduqda həmin xəstəliyi daha yüngül keçirir. Əgər uşaq öskürək, tetanus və qızılca əleyhinə peyvənd olunmayıbsa, bu xəstəliklərin ağırlaşması halları müşahidə edilə bilər. Peyvənddən əvvəl uşağın reaksiyası yox, ancaq qanda hemoqlobinin göstəricisi yoxlanılır, əgər aşağı olsa, uşaqda müalicə aparılır, daha sonra vaksin edilir. Peyvənd yad zülaldır və müəyyən reaksiyalar gözləniləndir. Məsələn, uşaqda 24-72 saat müddətində qızdırma ola bilər, yuxusu narahat ola bilər, amma bunlar keçicidir. Peyvənd vurulan kimi xəstəxanadan ayrılmaq məsləhət görülmür. Çünki həmin reaksiyalar həkin nəzarətində saxlanılmalıdır. Bəzi valideynlərin bir-iki peyvənddən sonra peyvəndləndirməni dayandırması da düzgün deyil. Uşaqlara zamanında vurulan bütün peyvəndlər onları təhlükəli xəstəliklərdən qorumuş olur”.

Ülkər Abdurahmanlı