Bu saatlarda evdən çıxmaq TƏHLÜKƏLİDİR - Günvurmadan özümüzü necə qoruyaq?
![Bu saatlarda evdən çıxmaq TƏHLÜKƏLİDİR - Günvurmadan özümüzü necə qoruyaq?](https://sfera.az/photo/orginal/2024/07/02/1719911867_2021-06-29-18-15-46fej8forommy10t1wek5z_file.jpg)
Xəbər verdiyimiz kimi, Azərbaycanda ötən ay 27 nəfəri gün vurub. 2023-cü ilin iyun ayı ərzində isə Bakı şəhəri üzrə təcili tibbi yardıma günvurma ilə əlaqədar 9 nəfərin müraciəti qeydə alınıb.
Bəs günvurmadan özümüzü necə qorumalıyıq?
Bununla bağlı TƏBİB–dən Sfera.az-a verilən açıqlamada bildirilib ki, günvurmanın ağırlıq dərəcəsinə görə yüngül, orta və ağır olmaqla 3 dərəcəsi var.
Qeyd olunub ki, yüngül dərəcə günvurma zamanı göz bəbəklərinin genişlənməsi, başgicəllənməsi, başağrısı müşahidə olunur:
“Orta-ağır dərəcəli günvurma zamanı xəstədə kəskin baş ağrıları, qusma, ürək bulanması, bədən temperaturunun artması və huşun itməsi müşahidə edilir. Ağır dərəcəli günvurma zamanı isə qeyd etdiyimiz hallarla yanaşı, sidik və nəcis ixracının qeyri-ixtiyari hal alması, bədən temperaturunun 40 dərəcədən yüksək olması, habelə komatoz vəziyyətdə isə ölümlə nəticələnə bilir”.
Qurum günvurma zamanı ilk yardımla bağlı məlumatı da bölüşüb:
“Günvuran şəxs sərin və ya kölgə olan yerə aparılaraq uzadılmalıdır; üst geyimi varsa, çıxarılmalıdır; boyun və sinə nahiyəsində sıxılma olmamalıdır (kəmər, qalstuk və s. çıxarılaraq rahat vəziyyətə gətirilməlidir); soyuq kompreslərdən istifadə edilməlidir (kompreslər boyun, alın, əl və ayaqların bilək hissələrinə qoyula bilər); bədən sulu dəsmal və ya parça ilə silinməlidir; su içirilməlidir (məsləhətdir ki, mineral su olsun, olmadığı təqdirdə isə orqanizmdə duz-su mübadiləsini tənzimləmək məqsədilə sərin suya az miqdarda duz və ya şəkər əlavə edilməlidir); huşun, nəfəsin, nəbzin itməsi müşahidə edilərsə, təcili tibbi yardım briqadası gələnə qədər süni nəfəs verməklə ürək masajı etmək lazımdır; qusma halı olarsa, yanı üstə uzadaraq qusuntu kütləsinin ağızdan tam çıxdığına əmin olmaq lazımdır”.
Məlumata görə, günvurmadan qorunmaq üçün sağlam qida və sağlam həyat tərzinə mütləq riayət etmək, gün ərzində 2-3 litr civarında maye qəbul etmək mütləqdir:
“Eyni zamanda məcbur olmadığı təqdirdə günəş şüalarının normadan çox olduğu zamanlarda (saat 10:00-dan 16:00-a qədər) evdən çıxmamaq və qeyd edilən saatlarda dənizə girməmək məsləhətdir”.
Günay