Dəridə olan səpkilər insanları narahat edən sağlamlıq problemlərindən biridir. Bədəndə, üzdə yaranan səpkilər və sızanaqlar müxtəlif daxili xəstəliklərin xəbərçisidir.

Bəs sızanaqlar hansı xəstəliklərin göstəricisidir?

Mövzu ilə bağlı Sfera.az-a danışan dermatoloq Sevinc Məmmədova bildirib ki, istər yeniyetməlik, istərsə də gənclik dövründə bir çox insanı narahat edən sızanaq xəstəliyi piy vəzilərinin iltihablaşması nəticəsində baş verir.

“Onlar, adətən, üzdə, sinədə, kürəkdə, yəni piy vəzilərinin çox olduğu nahiyələrdə meydana gəlir. Sızanağı saç folekullarının və piy vəzilərinin mürəkkəb xəstəliyi adlandırmaq olar. Sızanaqların yaranmasında ilkin səbəb piy vəzilərinin hiperfunksiyasıdır. Bədəndə yaranan sızanaqlar, əsasən, daxili xəstəliklərlə əlaqədar olur. Boyun nahiyəsində meydana gələn sızanaqlar böyrəküstü vəzilərin həddindən çox işlədiyinin göstəricisidir. Bu o deməkdir ki, orqanizmdə hormon pozğunluğu var. Çox şəkərli qidalar yedikdə və stressli həyat tərzi keçirdikdə də bu nahiyədə sızanaqlar yarana bilər. Çiyinlərdə müşahidə edilən sızanaqlar isə həddindən artıq stressin göstəricisidir”.

Dermatoloq qeyd edib ki, sinə bölgəsində yaranan sızanaqlar həzm sistemi ilə əlaqədardır.

“Yağlı, ədviyyatlı qidaları çox istehlak etmək və yaxşı qidalanmamaq onların yaranmasına səbəb olur. Qarın bölgəsində sızanaqlara çox az rast gəlinir. Bu hissədə əgər səpkilər olsa, bu, qan şəkərinin səviyyəsinin yüksək olması ilə bağlıdır. Omba və ayaqlarda yaranan sızanaq allergiya ilə sıx əlaqədardır. Bədən kremlərinin, duş gellərinin tərkibində olan bəzi maddələr allergiyaya səbəb olur. Həmçinin dərini ölü hüceyrələrdən təmizləmək üçün tərkibində salisil turşusu olan nəmləndiricilərdən istifadə etmək lazımdır. Bundan əlavə yuxu rejimini normaya salaraq və düzgün qidalanaraq bu problemdən xilas olmaq mümkündür”.

Ülkər Abdurahmanlı