Havalar soyumağa başlayan kimi “payız depressiyası” mövzusu aktuallaşır. Bunu yağışla əlaqələndirənlər də var, səbəbi kəskin hava dəyişikliyində görənlər də...

Xüsusilə xanımlar bu dövrdə depressiyaya daha çox meyil etdiklərini bildirirlər.

Maraqlıdır, “payız depressiyası” əsl səbəbi nədir?

Mövzu ilə bağlı Sfera.az-a açıqlama verən psixoloq Aytən Ələkbərova payız depressiyasının təməlinin aylar əvvəl qoyulduğunu deyib. Ekspertin sözlərinə görə, bu depressiyanın yaranmasında kənar təsirlərin, şəxslərin rolu böyükdür:

“Payız gözəl meyvələri baxımından bolluq ayıdır, havanın küləkli-yağışlı olması melanxolik insanların ruh halına təsir edə bilir. Digər tərəfdən bilirik ki, tədris ili başlayır və bəzən valideynlər övladları ilə bağlı hansısa işi çatdırmayanda təşvişə düşürlər, tükənmişlik yaranır. Yəni dediyim kimi, payız sindromunun kökü tükənmişlik sindromundan, xroniki yorğunluqdan gəlir. Belədə bədəndə olan fiziki yorğunluğun beyinlə birbaşa əlaqəli olduğunu da insanlar anlaya bilmir. Bu tip hallar varsa, vaxtında mütəxəssisə müraciət etmək lazımdır, çünki vaxtında müdaxilə olmasa, bipolyar, major depressiya yarana bilir. Bundan sonra isə məcbur olub antidepressantlardan istifadə edilir. Amma dərmanlardan nə qədər istifadə edilsə də, alt şüurda olan tükənmişlik sindromu növbəti yaz və payız fəslində də özünü göstərə bilər”.

Mütəxəssisin sözlərinə görə, xanımların payız fəslində bazarlıq edərək, yaxud görüntüləri ilə bağlı dəyişiklik edərək depressiyadan çıxması yanlış yanaşmadır:

“Bəzən bu fəsildə xanımlar görünüşləri ilə bağlı dəyişiklik etmək qərarı verərək əhvallarını düzəltməyə çalışırlar. Lakin bu, çıxış yolu deyil, onlar belə üsulla günlərini uzadırlar. Bu da qadınlarda müxtəlif xəstəliklərə yoluxmaları haqda fikirlər də yarada bilər. Psixoloji immunitetin aşağı düşməsi bədəndə  olacaq digər xroniki xəstəliklərin daha da ağırlaşmasına gətirib çıxarır. Ona görə də psixoloji immunitetin aşağı düşməsinə imkan vermək olmaz”.

Əzizə Zeynal