Son günlər əhali arasında yayılan infeksiya haqqında müxtəlif fikirlər səsləndirilir. Yoluxmanın kütləvi olduğu və prosesin ağır keçdiyi bildirilir.

Sfera.az-ın məlumatına görə, bununla bağlı fikirlərini bölüşən tibb elmləri doktoru, professor Musa Qəniyev deyib ki, ötən ilin dekabr ayından başlayaraq ilkin klinik əlamətlərindən biri temperaturun kəskin yüksəlməsi olan virus infeksiyasının ikinci dalğası artıq sönmək üzrədir:

“Davamlı yüksək temperatur, güclü əzələ-oynaq ağrısı və davamlı öskürək bu dalğaya xas olan əsas klinik əlamətdir. Lakin ağırlaşma və aşağı tənəffüs yollarının fəsadlaşma riski praktik olaraq müşahidə edilmir. Odur ki, diaqnostikada səhvə yol verilməməlidir. Yəni antibiotik və antiviral preparatlardan,  xüsusən insanlar arasında “sistem” adlandırılan mürəkkəb tərkibli venadaxili inyeksiyalardan istifadə olunmamalıdır. Əks halda, immunitetin geridönməz süstlüyü və viral infeksiyaların növbəti sıçrayışları zamanı ağır və bərpaolunmaz nəticələrə səbəb ola bilər. Viral infeksiyada gözlənilən sonuncu dalğa  fevralın üçüncü ongünlüyünə təsadüf etməlidir. Bu dalğa dinamik gedişli olub, mart ayında sönmə mərhələsinə qədəm qoyacaq. Sözügedən dalğa yüksək kontagiozluq, daha mülayim gediş, 2-3 gün davam edən subfebril və qismən febril  temperaturla, yəni yüngül soyuqlama əlamətləri ilə özünü göstərməlidir”.

Mütəxəssis qeyd edib ki, viral infeksiyada növbələşən sıçrayışlar fəsli dəyişikliklə əlaqədar olaraq, pandemiyaya qədərki illərdə də müşahidə edilib və gələcəkdə də ediləcək:

“Hazırkı yoluxmada insanları qorxudan yeganə fərq klinik gedişin nisbətən ağır, sağalma müddətinin isə uzun çəkməsidir. Bu da iki səbəblə əlaqədardır.  Birincisi, pandemiya dövründə tətbiq olunmuş uzunmüddətli sərt karantin, ikincisi isə COVİD-19-la bağlı son 3 ildə insanların beyninə yeridilən ölüm qorxusudur. Bu stress halı tək virusa yoluxma deyil, həm də əksər xəstəliklərin artması və ölümün çoxalmasına səbəb oldu. Çünki intensiv stress qanda kortizolun miqdarını kəskin artırır”.

Günay Rəsulqızı