Bir vaxtlar popun şahzadəsi, indi isə tənhalıq içində – Britni Spirsin həyat hekayəsi

Bir zamanlar dünyanın ən uğurlu pop müğənnisi hesab edilən 43 yaşlı Britni Spirs indi nadir hallarda ictimaiyyət qarşısına çıxır və əsasən Los-Ancelesdəki evində qalır. Ona yaxın mənbələrin sözlərinə görə, sənətçini yalnız mühafizəçilər və köməkçilər əhatə edir, əsl dostlarının sayı isə çox azdır.

 

2021-ci ildə uzunmüddətli qəyyumluqdan azad olan Spirs tam hüquqlarını və maliyyə üzərində nəzarəti geri qaytardı. Bu dövr əvvəlcə yeni başlanğıc kimi görünürdü: Sem Əsgəri ilə evlilik, uğurlu tərcümeyi-halın nəşri və Elton Con ilə musiqi əməkdaşlığı onun karyerasında ümidverici dönüş kimi qiymətləndirilirdi.

 

Lakin zaman keçdikcə narahatedici əlamətlər üzə çıxdı. 2023-cü ilin avqustunda Əsgəri boşanma üçün məhkəməyə müraciət etdi, digər münasibətləri də uğursuzluqla nəticələndi. O vaxtdan bəri Spirs ictimaiyyət arasında nadir görünür, sosial şəbəkə paylaşımları isə qeyri-adi rəqslər və qəribə videolarla diqqət çəkir. Bu isə həm pərəstişkarları, həm də yaxın çevrəsində narahatlıq doğurur.

 

Mənbələrin iddiasına görə, müğənni psixi sağlamlığı üçün təklif olunan yardımı qəbul etmir. Kaliforniya qanunlarına əsasən, məcburi müalicə mümkün olmadığından ailəsi və dostları vəziyyəti nəzarətdə saxlamaqda çətinlik çəkirlər.

 

 

Bununla belə, müsbət dəyişikliklər də var. Britni keçmiş əri Kevin Federlaynla böyütdüyü oğulları – 19 yaşlı Ceyden və 20 yaşlı Şonla münasibətlərini bərpa edir. Atası ilə əlaqələri kəsilən, anası və bacısı ilə münasibətləri isə gərgin qalan müğənniyə yaxın olanlar, bütün çətinliklərə baxmayaraq, onun xeyirxah və səmimi insan olaraq qaldığını bildirirlər.

 

Jurnalistlərin yazdığına görə, Britni Spirs həyatını istədiyi kimi yaşamaq hüququna sahibdir. Lakin ona ən yaxın olanlar sənətçinin rifahı üçün açıq şəkildə narahatdırlar.

 

Aysel