Mal-qara oğruları tutuldu

Ağcabədi rayonunda kütləvi şəkildə mal-qara oğrusu ilə məşğul olan dəstə aşkar olunub. Rayon polis şöbəsindən "Qafqazinfo”ya verilən məlumata görə, Hindarx qəsəbə sakini 1993- cü il təvəllüdlü Hüseynli Fərrux Bəhram oğlu, Kürdlər kənd sakinləri 1984-cü il təvəllüdlü Hüseynov Hikmət Afaq oğlu və 1979- cü il təvəllüdlü Şirinov Aydın Əhəd oğlu aparılmış istintaq əməliyyatları nəticəsində həbs edilib.
Hər üç şəxs birlikdə ötən il və bu il müxtəlif kəndlərdən birlikdə 274 baş mal-qara oğurlayıb.
Belə ki, sözügedən dəstə 3 iyul 2015- ci ildə Kürdlər kənd sakini Xəlilov Yaşar Teymur oğluna məxsus fermadan 26 baş xırdabuynuzlu mal-qara, 24 iyul 2015-ci ildə Hindarx qəsəbə sakini Hüseynov Xaləddin Ədil oğluna məxsus fermadan 38 baş qoyun, 21 avqustda yenə həmin qəsəbədə yaşayan Rzayev Şamil Daşdəmir oğluna məxsus olan fermadan 21 baş qoyun, 27 avqustda Şərəfxanlı kənd sakini Məmmədov Pərviz Elşən oğluna məxsus həyətdən 15 baş qoyun, 21 oktyabrda Quliyev Səxavət Əhəd oğluna məxsus fermadan 38 baş qoyun, 4 noyabrda Hindarx qəsəbə sakini Quliyev Bulud İnqilab oğluna məxsus fermadan 67 baş qoyun, 18 noyabrda Rəncbərlər kənd sakini Bayramov Şəmsəddin Zahid oğluna məxsus fermadan 63 baş qoyun, 11 yanvar 2016-ci ildə Şərəfxanlı kənd sakini Cəfərov İlham Naib oğlunun 1 baş iribuynuzlu malını, 13 yanvar 2016- ci ildə Dilağanlı kənd sakini Tağıyev Mirələm Zalış oğlunun beş baş iribuynuzlu malını oğurlayıblar.
Qeyd edək ki, Ağcabədi polisi rayon sakini Kamilə Əhmədovanı qətlə yetirən Cəlal Məhsimov və Samir İsayevi həbs edib. Həmçinin ötən ilin oktyabrında itkin düşmüş rayon sakini Valeh İsmayılovu qətlə yetirməkdə şübhəli bilinən Xəyyam Salehov və Namiq Məmmədov da həbs edilib.