İtən məktəblilər tapıldılar - \"Gecəni atılmış tikilidə keçiriblər\" - YENİLƏNİB
Nizami rayon Polis İdarəsinin 25-ci Polis Bölməsindən APA-ya verilən məlumata görə, azyaşlılar Hövsan qəsəbəsində tapılaraq ailələrinə təhvil veriliblər.
Polisdən, həmçinin bildirilib ki, itkin düşən uşaqlardan birinin nənəsi Hövsanda yaşayır. Uşaqlar da həmin ünvanda olublar.
----------
18:44
İtən uşaqlar bir neçə dəqiqə bundan əvvəl tapılıblar.
Bu barədə Sfera.az-a itkin düşmüş hesab edilən Şamilin anası Yekaterina xanım məlumat verib.
Onun sözlərinə görə, uşaqlar sağ-salamatdırlar və onlarla hər şey qaydasındadır: "Onlar bu müddətdə Hövsanda olublar. Məktəbdən çıxıb özləri üçün gəzməyə gediblər. Gecəni də hansısa dağılmış bir tikilidə keçiriblər. Hələlik onlarla ətraflı danışmağa vaxtımız olmayıb. Əsas odur ki, uşaqlar sağ-salamatdır. Bizim üçün də ən vacibi budur".
Qeyd edək ki, fevralın 17-də günorta saatlarında Bakının 32 saylı orta məktəbinin 5-ci sinif şagirdləri Şamil Babayev və İsmayıl Şəfiyev dərsdən çıxdıqdan sonra evə qayıtmayıblar. Kamera görüntülərindən bəlli olur ki, Nizami rayon 32 saylı orta məktəbin rus bölməsində 5-ci sinifdə təhsil alan 11 yaşlı Şamil Babayev və İsmayıl Şəfiyev dünən saat 17:20 radələrində məktəbdən çıxıb. Onlar piyada üzü "Neftçilər" metrostansiyası istiqamətinə gedib və "Dakar" dairəsi yaxınlığında kameraların nəzarət dairəsindən çıxıblar. Məktəblilər hərəkət edərək 25-ci Polis Bölməsinin ərazisindən 24-cü Polis Bölməsinin ərazisinə keçiblər.
