“Nə oldu? Qaçdılar dərhal öz “yiyələrinin” yanına ki, qoymayın bizi qırdılar...”
Yerli KİV-lər müdafiə naziri, general-polkovnik Zakir Həsənovun ötən həftə sonu Real TV-də "Mirşahinin vaxtı” proqramına verdiyi müsahibədən maraqlı fraqmenti yayıb. Həmin fraqmentdə nazir 2016-cı ilin aprel döyüşləri zamanı ermənilərin "öz yiyələrinin yanına qaçıb” kömək dilməsindən bəhs edir.
Zakir Həsənov bu məsələ haqda Ermənistanın baş naziri Nikol Paşinyanın Qarabağa dair avantürist, qızışdırıcı və təcavüzkar bəyanatlarına münasibət bildirərkən danışıb.
"Hesab edirəm ki, biz hərbçilər bu polemikada iştirak etməli deyilik. Bizim vəzifəmiz döyüşməkdir. Biz sözümüzü döyüş meydanında deyəcəyik və biz bunu arzulayırıq. Bu, yaxın vaxtda olacaq. Görəcəyik ki, o öz sözünün üstündə dura biləcək, ya yox?! Hesab edirəm ki, bizim Xarici İşlər Nazirliyi onlara layiqli cavab verib. Heç Ermənistan rəsmi dövlət kimi Qarabağı tanımayıb. Boş-boş danışmaq onlara qalacaq”, - deyə nazir vurğulayıb.
Nazir yada salıb ki, 2016-cı ildə Azərbaycan Ordusunun kiçik bir hissəsi Ermənistan ordusunu 3 gün ərzində darmadağın edib: "Onda məcbur olub səfərbərlik elan etdilər. Səfərbərlik nə zaman elan olunur?! Ordunun gücü tükənəndə… Qocaları yığır, toy-bayramla göndərir. Nə oldu? Qaçdılar dərhal öz ”yiyə”lərinin (Rusiya nəzərdə tutulur-red) yanına ki, "qoymayın, bizi qırırlar”. Lakin mən inanmıram ki, ikincidə bunların "yiyə”ləri bunların arxasında dayana bilsin”, – deyə nazir bildirib.
Virtualaz.org
