\"Qonşu dövlətlərdə qaçqın statusu almaq istəyənlər Azərbaycandan 2-3 dəfə çoxdur\"

"Xarici ölkələrə gedərək pasportlarını, sərhəd keçmə sənədlərini itirən və ya itirib deyə təqdim edən Azərbaycan vətəndaşları readmissiya sazişləri çərçivəsində bir müddətdən sonra həmin dövlətlərin miqrasiya qurumları tərəfindən ölkəmizə geri qaytarılır".

Sfera.az  xəbər verir ki, bunu jurnalistlərə açıqlamasında Dövlət Miqrasiya Xidmətinin rəisi Vüsal Hüseynov bildirib.

Xidmət rəisi qeyd edib ki, bu şəxslərin geri qaytarılması dövlət miqrasiya orqanları tərəfindən həyata keçirilir: "Readmissiya sazişləri çərçivəsində Azərbaycan vətəndaşlarının ölkəmizə geri qaytarılması ilə bağlı müraciətlərin statistikasında Almaniya nisbətən ön yerdədir. Ancaq qeyd etmək istəyirəm ki, bu hal dünyanın hər yerində var. Azərbaycanda isə belə hallar qonşu dövlətlərlə müqayisədə azdır. Gürcüstanda və Ermənistanda əhalinin say nisbətini nəzərə alsaq, bu ölkələrdə qaçqın statusu almaq üçün müraciətlər bizdən 2-3 dəfə çoxdur".//APA