AKP üçün sonun başlanğıcı? - 17 illik məğlubedilməzlik mifi dağıldı
"İstanbul seçkisi AKP-nin məğlubedilməzlik sindromuna ciddi zərbə vurdu. Ona görə AKP-nin bu uğursuzluğu onun məğlubiyyətə gedən yolunun başlanğıcı kimi səciyələndirilir.”
Sfera.az-a açıqlamasında İstanbulda baş tutan bələdiyyə seçkilərinin nəticələrini dəyərləndirərkən politoloq Nəzakət Məmmədova belə deyib.
Onun sözlərinə görə, bu nəticələr həm gözlənilən idi, həm də gözlənilməz oldu: "Əldə olunan nəticələr son 17 ildə AKP-nin uğradığı ən böyük məğlubiyyətdir. AKP-nin son 17 ildə ilk dəfə məğlubiyyətə düçar olması, İstanbul kimi mühüm şəhəri itirməsi ciddi hadisədir. Aydın məsələdir ki, İstanbulun itirilməsi həm də Türkiyənin itirilməsi kimi qəbul olunur.Ona görə AKP-nin İstanbul məğlubiyyəti onun məğlubiyyətə gedən yolunun başlanğıcı kimi səciyələndirilir”.
Həmsöhbətimizin fikrincə, qarşıdakı illərdə hakim partiya və onun lideri Ərdoğanı daha çətin proseslər gözləyir: "Bundan sonra AKP-ni daha çətin dönəm gözləyir. Qarşıdakı prezident və parlament seçkiləri ərəfəsi iri bir şəhərdə sanki müxalifətin anklavı yarandı. Belədə, 2023-cü ildə Ərdoğan üçün çox çətin olacaq”.
Qeyd edək ki, iyunun 23-də İstanbulda keçirilən təkrar bələdiyyə seçkilərində CHP-dən olan müxalifət namizədi Əkrəm İmamoğlu 55,03, hakimiyyətin namizədi Binəli Yıldırım 45,09 səs toplayıb. Aradakı səs fərqi 777 min 581 olmaqla İmamoğlunun xeyrinədir.
Elçin
