Ötən gün “Eurovision 2011” qalibi Nigar Camalın olduğu avtomobilin Quba yolunda qəzaya düşməsi ilə bağlı xəbər vermişdik. SİA-nın verdiyi məlumata görə, sosial şəbəkədə qəza anını əks etdirən videonun yayılması izləyicilər tərəfindən birmənalı qarşılanmamaşdı. Belə ki, görüntülərdə qəza baş verməzdən əvvəl Nigardan başqa, avtomobildə olan rəfiqələrinin mahnı oxuyub, rəqs etməsi öz əksini tapmışdı. Aralarında hicablı xanımın da olduğu gənclərin bu hərəkəti isə bəzi istifadəçilərin “əcəb oldu” reaksiyası ilə qarşılanmışdı.

 

Nigar Camal "İnstaqram" səhifəsində avtomobili idarə edən hicablı rəfiqəsinin onu ittiham edənlərlə və qəza ilə bağlı açıqlamasını yayıb: “Mənə bir şey maraqlıdır. Bu qədər kin insanlarda haradandır? Hər şeydən əvvəl bir candan söhbət gedir. İnsan “Allah kömək olsun” deyər. Hərə bu məsələyə bir cür baxdı: kimisi dedi Allah cəzalandırıb; bizi şəxsən tanıyanlar dedi, elədiyin yaxşı əməllər olunan dualar saxlayıb səni. Dindən, hicabdan, imandan danışan insanlar! Kimdə nə yoxdur, ondan danışır. Birini sevməyə bilərsən, amma ən azından ona hörmət qoymağa məcbursan. Dindən danışırsan, amma mənim haqqıma girirsən: dodaq slikon, qaş tatu. Musiqi haramdır deyənlərin 80%-nin telefonu mahnı ilə doludur. Məni, əxlaqımı, hicabımı müzakirə etmək heç kimə düşməz. İstər bu dünyada, istərsə də o biri dünyada hamısına görə özüm cavab verəcəyəm. Hicabdan dərs keçən əziz qardaşım, bacım, təbliğə öz evindən başla. Əvvəlcə ağzını təmizlə, “Allah” deyən ağzına söyüş gətirmə. Mənim heç kimlə işim yoxdur. Hər kəsin bir seçimi var. Mən sənin üçün bağlanmamışam ki, məni mühakimə eləyəsən. Sən kimsən? Müqəddəs, səhvsiz birisən? Məni cəhənnəmlik eləyən musiqiyə qulaq asıb, oynamaqdır? Oğurluq etmirəm, haram yemirəm, zina eləmirəm, insanların ailəsini dağıtmıram, insanları it kimi tutmuram, vicdanım rahat yatıb-dururam. Allaha şükür edirəm ki, elə bir qəzadan məni sağ çıxartdı”.