Rəmişin xanımı qəzəbləndi – “Nə istəyirlər bu kişidən?”
"Adam efirlərə çıxmağa peşman olur vallah. Rəmiş yaşlı adamdır, pilləkanlardan çıxıb halı pisləşib. Asqırırsan da yazırlar, bir az ayağın büdrəyir də yazırlar. Bunlar necə insandırlar, nə millətdirlər , başa düşmürəm".
Bunu xalq artisti Rafiq Hüseynovun (Rəmiş) həyat yoldaşı Güllü Hüseynova "Yeni Sabah"a açıqlaması zamanı deyib. O, Rəmişin səhhətindən tez-tez yazanlarla bağlı gileyini gizlətməyib:
"İnsandır da.. Rəmişin 75 yaşı var, pilləkan çıxanda bir az təngənəfəs olub. Burda nə var ki? Bilmirlər, nə yazsınlar. Rəmişin sənətindən, camaata xeyirxahlığından danışsınlar. Nə istəyirlər bu kişidən? Nə qədər şux yerimək istəsən də, yaş özünü göstərir. Bu qədər olmaz axı... Rəmişin hazırda ağciyərində oksigen çatmır. Xəstəlik də onunla gedəcək, müalicəsi yoxdur. O yer qalmayıb ki, aparmayaq. Allah Xoşqədəm xanımın canını sağ eləsin, Tolikə ömür versin. Tolik Rəmişin xəstəliyini işıqlandırdı, Xoşqədəm xanımın vasitəsilə də xəstəxanaya yerləşdirdik. 15 gün müalicə aldı. Onlar kimi gözəl insanlarımız var".
Qeyd edək ki, Rəmişin xəstə olması barədə ilk dəfə prodüser Tarix Əliyev (Tolik) "Hər şey daxil” proqramında məlumat vermişdi. O, ifaçının müalicə xərcinin 10 min manat olduğunu açıqlamışdı.