Böyük Britaniyanın paytaxtı Londonda iki hava limanı ilə bir metro stansiyası yaxınlığında tapılan 3 şübhəli paketdə əldədüzəltmə partladıcılar aşkar edilib. Bu barədə Böyük Britaniya polisindən açıqlama verilib.

 

  Verilən açıqlamada Londonun Hitrou və Siti hava limanları ilə Vaterlo metro stansiyası yaxınlığında tapılan 3 paketdə əldədüzəltmə partladıcılar aşkar edildiyi bildirilib. Açıqlamada hər üç paketin də açıldığı halda kiçik bir yanğına yol açma gücündə olduğu qeyd edilib.

 

Ağ zərflər daxilində olan partladıcıların bir-biri ilə əlaqəli olduqlarının düşünüldüyü qeyd edilən açıqlamada cinayətkar və ya cinayətkarların məqsədi ilə bağlı şərh verilməyib. Polis müdaxiləsi zamanı hava limanları ilə metro stansiyasındakı səfərlərdə gecikmə olmayıb. Xatırladaq ki, Böyük Britaniyada 2017-ci ildə baş verən 5 terror hücumunda 36 nəfər həyatını itirmişdi.