KXDP nüvə silahından imtina edə bilər-Hanoy görüşü buna ümidləri artırıb
Gündəm
10:20 / 28.02.2019
3097
"Trampla Kim Çen In arasında olacaq növbəti görüşdə hətta iki tərəf arasında hansısa bir müqavilə də imzalana bilər”
Sfera.az-a açıqlamasında bu sözləri ABŞ prezidenti ilə Şimali Koreya lideri arasında Vyetnamın paytaxtı Hanoyda baş tutan görüşü dəyərləndirərkən "Atlas” Araşdırmalar Mərkəzinin rəhbəri Elxan Şahinoğlu deyib.
Ekspertin sözlərinə görə, bu görüşdən sonra müəyyən gözlənti və istəklərin reallaşması müqabilində Pxenyanın nüvə silahından imtina edəcəyinə olan ümidlər də artıb:
"ABŞ prezidenti Donald Trampla Şimali Koreya lideri Kim Çen In arasında Xanoyda keçirilən çörüş pozitiv olub. Onlar arasında yaşanan problemlər görüşlər vasitəsilə zaman-zaman aradan qaldırılır. Düşünürəm ki, iki ölkə rəhbəri arasında olacaq növbəti görüşdə hər hansı bir müqavilə də imzalana bilər. Həmin müqavilə əsasında da Şimali Koreya nüvə silahından imtina edə bilər. Bunun əvəzində isə Şimali Koreyanın Qərbdən müəyyən gözlənti və istəkləri var. İstəklərinin yerinə yetirilməsi qarşılığında Pxenyan bəlkə də nüvə silahından imtina edə bilər. Bunun üçün də danışıqlar müsbət atmosferada davam etməlidir. Prosesdə hələlik məhz bu istiqamətdə gedir. Danışıqların müsbət nəticələnməsi qonşu Cənubi Koreya və Yaponiya üçün də xeyirlidir. Çünki hər zaman onlar Şimali Koreyadan özləri üçün təhlükə hiss edirdilər. Hər halda Xanoyda baş tutan bu görüş Şimali Koreyanın əvvəllər həyata keçirdiyi təhlükəli tendensiyalardan uzaqlaşmağa doğru istiqamətləndiyinə bir işarədir. Ümumiyyətlə, bu sayaq görüşlərin sayı artdıqca təhlükələr də arxada qalır. Artıq Şimali Koreya lideri də anlayır ki, nüvə silahından imtina etməyin zamanı yetişir”.
Qeyd edək ki, bu gün ABŞ prezidenti Donald Tramp və KXDR lideri Kim Çen In Hanoyda təkbətək görüş keçirilib. Görüş 30 dəqiqə çəkib. Ardınca iki ölkə lideri bir neçə saat davam edəcək geniştərkibli danışıqlara başlayıblar. Bu onlar arasında baş tutan ikinci belə görüşdür. Hansı ki, həmin görüş dünya ictimaiyyətinin böyük diqqət mərkəzindədir. Bəşəriyyət bu görüşlərin nəhayət müsbət impuls verəcəyinə ümid edir.
ELÇİN
