Nazirliyin 50 nəfərlik heyəti Xızıya yola düşdü - Meşə yanır
Bu gün saat 12 radələrində Xızı rayonunun Dizəvər yaylağında yanğın baş verib.
Ekologiya və Təbii Sərvətlər Nazirliyindən daxil olan xəbərə görə, naməlum səbəblərdən baş verən yanğının söndürülməsi və meşə fondu torpaqlarına keçməsinin qarşısının alınması üçün Ekologiya və Təbii Sərvətlər Nazirliyinin yerli qurumlarının və Fövqəladə Hallar Nazirliyinin Dövlət Yanğından Mühafizə Xidmətinin canlı qüvvəsi və texnikası hadisə yerinə cəlb olunub.
Hazırda meşə fondu ilə sərhəd olan yaylaqda baş vermiş yanğının qarşısının alınması istiqamətində ciddi və operativ işlər davam etdirilir.
***
Ekologiya və Təbii Sərvətlər Nazirliyinin (ETSN) mətbuat xidmətinin rəhbəri İradə İbrahimova "Qafqazinfo"ya açıqlamasında bildirib ki, əsən külək nəticəsində yanğın qismən meşə ərazisinə keçib: "Bu gün Xızı rayonunun Dizəvər yaylağında baş vermiş yanğın küləkli hava şəraiti ilə əlaqədar daha geniş ərazini əhatə edərək qismən meşə fondu torpaqlarına keçib və kol-kos yanğına məruz qalıb. Hadisənin ciddiliyi nəzərə alınaraq ETSN-in Fövqəladə Hallar üzrə Tədbirlər Mərkəzinin lazımi avadanlıqları götürülərək, Nazirliyin 50 nəfərlik heyəti də Xızı rayonuna yola düşüb".
Nazirliyin sözçüsü həmçinin qeyd edib ki, yanğının daha geniş əraziyə keçməsinin qarşısının alınması məqsədilə Ekologiya və Təbii Sərvətlər və Fövqəladə Hallar Nazirliklərinin əməkdaşları ciddi tədbirlər görür: "Hazırda yanğının söndürülməsi istiqamətində tədbirlər davam etdirilir". //“Qafqazinfo”
Sfera.az
