“Paşinyanın gizli Qarabağ anlaşması…” - Sürpriz zəng İrəvanı silkələdi

ABŞ prezidentinin milli təhlükəsizlik məsələləri üzrə müşaviri Con Bolton Azərbaycan Prezidenti İlham Əliyevə etdiyi telefon zəngindən danışıb.

O, bu barədə özünün Tvitter səhifəsində yazıb.

Bolton paylaşımında qeyd edib:

"Azərbaycan Prezidenti İlham Əliyevlə telefonla danışdım. Dağlıq Qarabağ münaqişəsinin dinc yolla həllini, təhlükəsizlik sahəsində işbirliyini və ABŞ-la qarşılıqlı maraq kəsb edən digər məsələləri müzakirə etdik”.

Ermənistan mediası və ekspertləri Boltonun Azərbaycan dövlət başçısına zənginə xüsusi diqqət ayırıb.

Erməni mənbələr bir neçə gün əvvəl ABŞ prezidentinin müşavirinin Ermənistan Baş naziri Nikol Paşinyana zəngini xatırladır və qeyd edirlər ki, Bolton İlham Əliyevdən fərqli olaraq, erməni baş nazirlə Dağlıq Qarabağ məsələsini müzakirə etmədi:

"Bolton bir neçə gün əvvəl Paşinyana da zəng etmişdi. Lakin onunla Qarabağ məsələsini müzakirə etmədi. Görüş ümumi məsələlərin – Ermənistan-ABŞ münasibətlərinin vəziyyətinin müzakirəsi ilə yekunlaşdı. Tərəflər bölgədəki son vəziyyətlə bağlı müzakirələr aparsalar da, Əliyevdən fərqli olaraq, Bolton Qarabağ məsələsini Paşinyanla danışmaq istəməyib”.

Lakin erməni politoloq Stepan Danielyan bu barədə Paşinyana şübhə ilə yanaşır.

O, iddia edir ki, Paşinyan Boltonla Qarabağ haqda danışıb, lakin bunu cəmiyyətdən gizlədir: "Məlum zəng İlham Əliyev və Nikol Paşinyan arasında Davosda 1.5 saat davam etmiş görüşdən sonraya təsadüf etdi. Paşinyan isə iddia edir ki, amerikalı diplomatla Qarabağ məsələsini müzakirə etməyib. Bu, doğru deyil. Müzakirələrdə Qarabağ ifadəsi işlənməsə belə, bu o demək deyil ki, bu məsələ ətrafında müzakirə olmayıb. Hər halda Boltonun Davos görüşündən dərhal sonra İrəvana zəng etməsinin bir məntiqli mənası olmalıdır.

Amerika mediasının "ABŞ prezidenti” adlandırdığı Con Boltonun gözlənilməz əngi Paşinyanı sevindirə bilər. Ən azı İran məsələsi müzakirə edilməmiş olmaz. Hesab etmək olar ki, İran və Qarabağ məsələlərinin biri-birinə aidiyyəti var”.

Danielyan Paşinyanın ABŞ və Azərbaycanla gizli Qarabağ anlaşmasına getməsindən şübhələndiyini qeyd edib.Teleqraf