Türkiyə Futbol Federasiyası yeni mövsüm öncəsi "Ulusal Kulüp Lisansı" - "Beynəlxalq Klub Lisenziyası" alan klubların adlarını açıqlayıb. 

Sfera.az sport7.az-a istinadən xəbər verir ki, bu lisenziya TFF tərəfindən maliyyə durumları, işçilərin peşəkarlıq səviyyəsi və infrastrukturun vəziyyəti təftiş edildikdən sonra sınaqdan üzüağ çıxan klublara verilir. Qəribədi ki, yeni mövsümdə lisenziya ala bilməyən klubların arasında birdən-birə İzmir şəhərini təmsil edən 4 klubun da adına rast gəlinib. Kamran Ağayevin yenicə müqavilə bağladığı "Karşıyaka"dan başqa "Göztəpə", "Altay", "Altınordu" lisenziyaya layiq bilinməyib. 

TFF əsas səbəb kimi İzmirdəki stadionların yaxşı durumda olmamısını göstərib.Tarixi "Altınsancak" stadionu bu yaxınlarda zəlzələyə davamlı olmamasına görə sökülüb, çempionatın startına 1 ay qalmış isə İzmir Atatürk Stadionu təmirə bağlanıb. İzmir təmsilçilərinin rəhbərliyi və azarkeşlər TFF-nin bu qərarlarının arxasında siyasi motivlərin dayandığını iddia edirlər. Belə ki, hazırda hakimiyyətdə olan AKP uzun illərdi ki, keçirilən bütün seçkilərdə izmirlilərin etimadını qazana bilmir. Məhz bu səbəbdən də İzmir dövlət layihələrindən kənarda saxlanılır, şəhərin abadlığına, sosial və idman qurğularının inşaasına büdcədən vəsait ayrılmır.

Xatırladaq ki, lisenziya ala bilməyən klublara TFF tərəfindən pul cəzası kəsilməklə yanaşı, onların avrokuboklarda iştirakına qadağa qoyulub.