Bəhruz Quliyev: "Bu, Prezidentin hər bir vətəndaşa olan diqqətinin nümunəsidir" AÇIQLAMA

 

Media Qrupun rəhbəri qeyd edib ki, Prezident İlham Əliyevin hadisə ilə bağlı göstərdiyi reaksiya Azərbaycanda söz və məlumat azadlığının prioritet istiqamət kimi əsas götürməsinin sübutudur: “Cənab Prezident hər zaman vurğulayıb ki, fikir plüralizmi dövlətin marağında olan əsas faktorlardandır. Bu baxımdan, qeyd edə bilərik ki, Azərbaycanda media ilə bağlı mövcud olan qanunların icrası, ümumiyyətlə, mətbuatla əlaqədar hər bir hadisə ölkə başçısı tərəfindən nəzarətdə saxlanılır. Məhz jurnalist həmkarımızın məlum səbəblər üzündən həyatını itirməsi, bunun ardınca isə dövlət başçımızın əlaqədar dövlət qurumlarına xüsusi tapşırıq verməsi qeyd edilən fikirlərin bariz göstəricisidir. Ümumiyyətlə, Cənab Prezidentin bu hadisəni ölkədə söz və məlumat azadlığına təhlükə və təhdid kimi qiymətləndirməsi hər bir vətəndaşa olan diqqətin nümunəsi kimi də qiymətləndirilə bilər. Çünki bu müstəvidə olan prinsiplərin, maraqların pozulması eyni zamanda dövlətin maraqlarına və reallaşdırılan uğurlu dövlət siyasətinin mahiyyətinə kölgə sala bilər. Ona görə də Prezident İlham Əliyev həmin prinsipləri şəxsi nəzarətində saxlamaqdadır. Biz də media təmsilçiləri olaraq əminik ki, bu hadisədə günahı olan istənilən şəxs qanun qarşısında cavab verəcəkdir”.

 

Bəhruz Quliyev bununla yanaşı, hadisə baş verdikdən az müddət sonra bir sıra media orqanlarının, o cümlədən bəzi müxalifət liderlərinin tələm-tələsik nəticə çıxarmalarına, bu olaya məqsədli şəkildə siyasi don geyindirməyə cəhd göstərmələrinə də münasibət bildirib. Media Qrupun rəhbəri xatırladıb ki, yalnız bu hadisə deyil, digər arzuolunmaz hadisələr baş verdikdə də şəxsi mənfəətlərini və çirkin siyasi məqsədlərini güdən radikal müxalifət liderləri dərhal ortaya atılaraq, dövlətə qarşı qarayaxma kampaniyalarına start verirlər: “Bir məsələyə də diqqət çəkmək istərdim. Belə ki, mərhum jurnalist dəfn edilərkən sosial şəbəkələrdən də gördük ki, bir sıra radikal müxalifət liderləri özlərini reklam etməklə məşğul idilər. Bəllidir ki, onlar heç də həmkarımızın həyatını itirməsinə görə deyil, öz şəxsi məqsədlərini güdməkdən, siyasi uğursuzluqlarını bu yolla ört-basdır etməkdən  ötrü bu cür yanlışlıqlara gediblər. Biz bu kimi halları yaşayış binasında baş verən yanğın zamanı da gördük. Məqsəd yenə də siyasi mənfəət əldə etmək, xalqın qanı üzərində uğur qazanmaqdır. Belələrinin xəmirləri onsuz da xalqın qanı üzərində yoğrulub. Belələrinə yalnız "ar olsun" deyə bilərik, onlar hətta insanların hüznündən, kədərindən sui-istifadə etməklə məşğuldurlar”.

 

Bəhruz Quliyev son olaraq jurnalist Rasim Əliyevin vəfatından dərin təəssüf hissi keçirdiyini bildirərək, mərhumun ailəsinə səbr diləyib.