Azərbaycanda uşaq ədəbiyyatı və mətbuatına maraq yoxdur-Niyə?
Təhsil
11:59 / 11.01.2019
4198
"Uşaq mətbuatı və uşaq ədəbiyyatının inkişafına nail olmaq üçün stimullaşdırıcı addımlara ehtiyac var”
Sfera.az-a açıqlamasında bu sözləri Azərbaycanda uşaq mətbuatı və uşaq ədəbiyyatının demək olar ki, mövcud olmamasına münasibət bildirərkən "Xalq Cəbhəsi” qəzetinin baş redaktoru Elçin Mirzəbəyli deyib:
"Ənənəvi sovet standartını çıxarıb atıb, yeni, müasir, uşaqların dünya görüşünə uyğun gələn, onlara daha çeşidli informasiyalar verə biləcək məlumatlar təqdim olunmalıdır. Hazırda uşaqların başını çırtdanın nağılları ilə qatmaq mümkün deyil. Məsələyə daha kreativ və daha yaradıcı yanaşmaq lazımdır. Bu baxımdan uşaq mətbuatı mövcud olsa da, populyarlıq qazanmır. Uşaq ədəbiyyatı məsələsində də mütləq stimullaşdırıcı addımlar atılmalıdır. Birinci növbədə uşaqlara oxu mədəniyyətini təbliğ etmək lazımdır. Valideynlər məktəbdənkənar oxu vəsaiti kimi, uşaqlarına kitab oxumağı öyrətməlidir. Digər tərəfdən, daha peşəkar şəxsləri uşaq ədəbiyyatının yaradılmasına stimullaşdırmaq lazımdır. Bir ədəbiyyat adamı üçün daha geniş kütləyə xitab etmək daha önəmlidir, nəinki uşaq ədəbiyyatı ilə məşğul olmaq. Həmçinin, ədəbiyyat adamları arasında uşaq ədəbiyyatına bir qədər qeyri-ciddi yanaşma var. Bu aspektdən də mövcud situasiya yaranıb. Ayrı-ayrı müsabiqələr keçirmək və yaxud nəşriyyatların özləri tərəfindən sifariş verilməsi şərtilə müəyyən stimullaşdırıcı addımlar atılarsa, mədəniyyət adamları prosesə cəlb oluna bilərlər”.
Qeyd edək ki, sovetlər dönəmində Azərbaycanda uşaq ədəbiyyatı və uşaq mətbuatı da müəyyən dərəcədə inkişaf etmişdi. Hər il yazıçı və şairlərin uşaqlara həsr etdiyi çoxsaylı hekayə, roman və şeyirləri işıq üzü görürdü. Uşaqlar həmin illərdə böyük həvəslə "Göyərçin” jurnalını izləyirdilər. İndi isə ölkəmkizdə uşaq ədəbiyyatı və mətbuatı demək olar ki, yox səviyyəsindədir. Müasir dövrün ədəbiyyat adamları uşaq və gənclərin maraq və istəklərini nədənsə qarşılaya bilmirlər.
ELÇİN
