Azərbaycan bankları müştəri qıtlığı çəkir

Son aylar Azərbaycan banklarında sözün əsl mənasında müştəri qıtlığı hiss edilir. Fins.az-ın pərakəndə bankçılıqla məşğul olan bankların filiallarında apardığı müşahidələrdən məlum olur ki, insanlar daha əvvəlki kimi kredit götürmək üçün saatlarla gözləməli olmurlar. Bank filialları əksər hallarda boş olur, əsasən kreditlərə görə ödənişləri qəbul edir. Müştərilərin azlığı bankları müraciətlərə daha operativ baxmağa vadar edib. Əvvəllər müştərinin sənədləri və ödəmə qabiliyyəti bir neçə saat ərzində araşdırılır, bəzən isə buna bir neçə gün sərf edilirdi. İndi isə kredit üçün müraciətlərə isə ən geci 1 saat ərzində baxılır.

"Müştəri gələndə sevinirik"

Halbuki, bir neçə ay bundan əvvəl banklarda tamamilə fərqli mənzərə hökm sürürdü. Yüzlərlə insan kredit götürmək üçün növbəsini gözləyir, kredit mütəxəssisləri başlarını qaşımağa belə vaxt tapmırdılar. “Vaxt var idi, nahara çıxmağa belə imkan olmurdu, müştəri o qədər çox idi ki, yerimizdən tərpənə bilmirdik, indi isə müştəri gələndə sevinirik” – deyə kredit mütəxəssislərindən biri fins.az-a bildirib.

“Camaatın dollar kreditlərindən gözü qorxub”

Bank mütəxəssisləri Azərbaycanda kredit bumunun yatmasını devalvasiyanın nəticəsi kimi qiymətləndirir. Onların sözlərinə görə, manat kəskin ucuzlaşandan sonra ölkədə iqtisadi aktivlik zəifləyib, xeyli sayda iş yeri bağlanıb ki, bu da öz növbəsində kredit götürmək istəyənlərin sayını azaldıb. Bundan başqa, devalvasiyadan sonra bankların əsasən dollarla kredit təklif etməsi də kredit müraciətlərinin azalmasına səbəb olub: “Camaatın dollar kreditlərindən gözü qorxub. Ona görə də, çalışırlar manatla götürsünlər, onu da hər bank vermir”. Və nəhayət, Azərbaycan Mərkəzi Bankının (AMB) tələbi ilə banklar müştərilərə qarşı gəlir tələbini sərtləşdirib. İndi kredit götürmək istəyənlərin daha çox rəsmi gəlirləri nəzərə alınır, eləcə də onların başqa banklarda öhdəliklərinə baxılır. Son nəticədə hamı kredit ala bilmir: “Əvvəllər təkcə bizim bankdakı tarixçəsinə baxıb kredit verirdik, heç baxmırdıq ki, başqa bankda özünü necə aparıb. Amma indi elə deyil. Yüz ölçüb-biçəndən sonra kredit veririk”.

Banklar komissiyadan da keçməyə hazırdır

AMB-nin tövsiyyəsi əsasında ölkədəki bankların əksəriyyəti kreditlər görə tutulan komisyon haqqını 1%-ə qədər azaldıb. Amma bu amil belə kredit götürmək istəyənlərin sayına ciddi təsir göstərməyib. Buna görə də, bəzi banklar hətta komisyon haqqından belə imtina etməyə hazırdırlar, təki normal müştəri tapıb ona kredit versinlər. Bunu banklarda müştərilərə göndərilən “Komissiyasız kredit” mesajlarından da hiss etmək mümkündür.

Faizlərdə endirim də edilir

Bankların müştəri cəlb etmək üçün atdığı addımlardan biri də mütəmadi olaraq faiz dərəcələrinin endirilməsidir. Halbuki banklar vaxtilə endirimi yalnız bayramlarda edərdilər. Bu il isə az qala bütün yay fəslini banklar endirim kampaniyası ilə keçiriblər.

Sfera.az