Araz Əlizadə: "Rüstəm İbrahimbəyov pula görə çox şeyləri qurban verib"
15:44 / 24.05.2018
3193
Azərbaycan Sosial Demokrat Partiyasının sədri, Milli Məclisin deputatı Araz Əlizadə ssenari müəllifi Milli Şuranın fəxri sədri Rüstəm İbrahimbəyov olan "Qafqaz triosu” adlı filmin etiraz doğurmasına münasibət bildirib.
Deputat Sfera.az-a açıqlamasında deyib ki, Rüstəm İbrahimbəyov pula görə çox şeyləri qurban verib:
"Rüstəm İbrahimbəyovun əsərləri ayrı, daxili isə tamam ayrıdır. Ona görə də daxili reallığı nəhayət ki, üzə çıxıb. Bilirsiniz, şərab qıcqıranda sirkəyə çevrilir. Sirkəni isə içmək olmur. Rüstəm İbrahimbəyov tanınmış Azərbaycan ziyalısı idi. Ancaq o, hər zaman Azərbaycanın mənafeyini güdüb. Lakin pul maraqları ilə Azərbaycan maraqları arasında qalanda, o birincini seçdi. Rüstəm İbrahimbəyov pula görə özünün yaxın dostu olmuş Nikita Mixalkovla da düşmənə çevrilib".
Araz Əlizadə qeyd edib ki, Rüstəm İbrahimbəyov üçün Azərbaycanda bütün imkanlar yaradılmışdı:
"Azərbaycan iqtidarı onun üçün nələr etməmişdi! Kiçik bir torpağa görə Azərbaycan hakimiyyəti və dövlətilə düşmən oldu. Bəzən deyirlər ki, filankəs əsl ziyalıdır və sairə. Mənim o sözdən xoşum gəlmir. İnsanın gərək qəlbi ziyalı olsun, işıq saçsın".
Deputat əlavə edib ki, Rüstəm İbrahimbəyov "Qafqaz triosu” filmində ümumi Azərbaycan obrazını deyil, özünün daxili obrazını yaradıb.
Orxan Bəşirov
Sfera.az
