Milyarder Məhəmmədov qardaşlarına ittiham irəli sürüldü - 2,5 milyard rubl...
12:22 / 11.05.2018
2993
"Summa” qrupunun sahibi Ziyavuddin Məhəmmədov və sabiq senator Məhəmməd Məhəmmədova büdcə vəsaitlərinin talanı məqsədilə mütəşəkkil cinayətkar qruplaşmanın təşkili maddəsi ilə ittiham irəli sürülüb.
Sfera.az xəbər verir ki, bu barədə öz mənbələrinə istinadən "Kommersant” qəzeti yazıb.
Xatırladaq ki, Məhəmmədov qardaşları və "İnteks” şirkətinin sabiq başçısı Artur Maksidov 30 martda həbs olunmuşdular. Müstəntiq onların mütəşəkkil cinayətkar qruplaşmanın təşkilində, küllü miqdarda mənimsəmə və dələduzluq işində şübhəli sayıldıqlarını bildirmişdi.
Mənbənin bildirdiyinə görə, Ziyavuddin Məhəmmədov başçılıq etdiyi cinayətkar qruplaşmanın "iqtisadiyyat”ına cavabdehmiş. Qardaşı Məhəmməd Məhəmmədov isə qanunsuz əməliyyatları ört-basdır etmək üçün siyasi və hüquqi dəstək verirmiş. Artur Maksidov isə qardaşların ən yaxın tərəfdaşı kimi ittiham olunur.
İstintaqın hesablamasına görə, onların fəaliyyəti nəticəsində dəyən ziyan 2,5 milyard rublu keçib.
Milyarder qardaşların adı Rusiyada keçiriləcək 2018 DÇ-na hazırlıq üçün Kalininqrad və Peterburqda tikilən futbol stadionlarının tikintisindən vəsait mənimsəmək işində hallanır.
Sfera.az
