Bu sözləri Sfera.az-a açıqlamasında Milli Məclisin İqtisadi siyasət, sənaye və sahibkarlıq komitəsinin sədri, akademik Ziyad Səmədzadə bildirib. 

Komitə sədri qeyd edib ki, tarixdə ilk dəfə olaraq Heydər Əliyev Azərbaycanın təbii resurslarından milli maraqları qorumaqla öz xalqının xeyrinə istifadə edilməsinə nail olub:

"1994-cü ildə "Əsrin müqaviləsi" neft kontraktının imzalanması adi məsələ deyildi. Həmin dövrdə Azərbaycan iqtisadi böhran içərisində idi, ölkəmizin valyuta ehtiyyatları yox idi, investisiya mühiti sağlam deyildi, qanunvericilik sistemində boşluqlar vardı. Amma Heydər Əliyev şəxsiyyətinin dünya liderləri arasında böyük nüfuza malik olması nəhəng xarici şirkətlərin Azərbaycana gəlməsini təmin etdi. Biz bu gün həmin şirkətlərlə bağlanan müqavilələrin çox böyük sosial-iqtisadi nəticələrini görürük. "Əsrin müqaviləsi" bağlanmasaydı, Azərbaycanın müstəqilliyi təhlükə altında olacaqdı. Çünki dünyada neftlə zəngin olan çoxsayda ölkələr var. Ancaq həmin ölkələrin heç də hamısı xoşbəxt deyil. Azərbaycandan da çox neft çıxaran ölkələr olub, indi də var. Ancaq onların bəzilərində siyasi sabitlik, konsensus, maliyyə sabitliyi yoxdur, etnik toqquşmalar davam edir, əhalinin sosial problemlərinin həlli üçün sistemli tədbirlər həyata keçirilmir". 

Z.Səmədzadə deyib ki, Heydər Əliyev dünya təcrübəsini nəzərə alaraq, Azərbaycanın inkişaf modelini müəyyən edib:

"Bu model indi də Azərbaycan xalqının tərəqqisinə xidmət edir. Cənab prezident İlham Əliyev 2003-cü ildə ölkə başçısı seçiləndə də bəyan edib ki, Azərbaycan Heydər Əliyev ideyalarını davam etdirəcək. Cənab İlham Əliyev 2018-ci ildə prezident seçiləndən sonra bir daha bəyan edib ki, Heydər Əliyev siyasəti Azərbaycana böyük uğurlar gətirib. Əgər Heydər Əliyev siyasəti olmasaydı, Azərbaycan müstəqil olmayacaqdı. Ona görə də bu gün Heydər Əliyev siyasəti haqqında danışdıqda, ilk növbədə bildirməliyik ki, Heydər Əliyev müstəqil Azərbaycan dövlətinin qurucusudur. Heydər Əliyev Azərbaycanın müstəqilliyini əbədi etmək üçün fəaliyyət göstərən liderdir. Heydər Əliyev qloballaşan dünyada, siyasi təzyiqlərin, etnik toqquşmaların, risklərin genişləndiyi şəraitdə Azərbaycan dövlətinin müstəqilliyini dünyada tanıdan, onun nüfuzunun artırılması üçün hüquqi, siyasi mühit yaradan dahi şəxsiyyətdir".

Akademik vurğulayıb ki, bu gün Azərbaycan dövləti Heydər Əliyevin layiqli davamçısı prezident İlham Əliyev tərəfindən çox uğurla inkişaf etdirilir:

"Prezident İlham Əliyevin apardığı siyasət, onun iqtisadi və sosial sahələrdə gördüyü işlər birmənalı şəkildə sübut edir ki, Azərbaycan bundan sonra daha da yaxşı yaşayacaq. Artıq bizim inkişaf modelimiz var. Bu inkişaf modelinin ana xəttini isə milli maraqların qorunması, Azərbaycan dövlətinin iqtisadi qüdrətinin gücləndirilməsi, iqtisadi təhlükəsizliyin və ölkənin müdafiə qabiliyyətinin təmin edilməsi kimi nəcib məqsədlər təşkil edir. Bu məqsədlərin də həyata keçirilməsi üçün konkret proqramlar, strateji layihələr həyata keçirilir".