Hindistan istehsalı olan peyvəndləri uşaqlara vurdurmaq olarmı? - Pediatrdan peyvəndlə bağlı suallara CAVAB

Pediatr Aytən İsmayılzadə Sfera.az-a açıqlamasında bu haqda danışıb.

 

O bildirib ki, mütəmadi olaraq valideynlər tərəfindən ona bu cür suallar verilir: 

"Bu gün valideynləri ən çox narahat edən suallardan biri də budur ki, poliklinikada peyvənd edək, yoxsa özəl xəstəxanada.Bu iki müqayisə kənddə böyüyənlə şəhərdə böyüyənin müqayisəsinə bənzəyir. Adı özəl, özü gözəl olan bir klinikada vaxtından 6 ay keçmiş və heç də bütün komponentləri olmayan preyvəndin uşağa vurulduğunun şahidi olmuşam. Özü də lap yaxşı tanıdığımız həkim tərəfindən belə bir addımın atıldığını görmüşəm. Poliklinikada vurulan Hindistan istehsalı olan peyvəndi inək əti yediyinə görə qonşusunu daşqalaq edən hindli istehsal etmir. Onun da istehsal texnologiyası və xammalı digərləri kimidir. Zavod məkan olaraq orada yerləşir və yerli işçi qüvvəsindən istifadə edilir. Peyvənddən yaranan hərarət və s.yaxşıdır. Bu əlamətlər uşağa vurulan iynənin ən azından su olmadığını, immuniteti oyadan bir şey olduğunu göstərir. Özünüz də istədiyiniz ölkə istehsalı olan peyvəndi daha ucuz əldə edib vurdura bilərsiz.  Bu halda yalnız soyuq zəncirə əməl etməli olacaqsız”.

Pediatr bildirib ki, hər an hər şey ola bilər. Bu isə o demək deyil ki, baş verən hər hansı hadisə mütləq peyvənddən qaynaqlanır: 

"Öz uşaqlarımın da peyvəndini dövlət poliklinikasında heç istehsalçı ölkəsinə baxmadan, vaxtında etdirmişəm. Baş verən hər hansı hadisəni peyvəndlə əlaqələndirmək sadəcə olaraq məntiqsizlikdir”.