Deputat: “Artur Rasizadə yenə də baş nazir ola bilər”

Bu sözləri Sfera.az-a açıqlamasında Milli Məclisin deputatı, professor Fəzail İbrahimli bildirib. 

Fəzail İbrahimli bu fikirini Milli Məclisdə çıxışı zamanı da söylədiyini deyib:

"Mənim bu fikrimə kimsə etiraz edə də bilər. Bu onların öz işləridir. Ancaq fikrimdə qalıram. Bəzən Artur müəllimi yaşına görə tənqid edirlər və sairə. Ancaq hər birimiz gəlib o yaşa çatacağıq. Ümumiyyətlə, yaş məsələsinə qarışmaq olmaz. Ölkə prezidenti onunla ünsiyyətdə olur, onun bacarığına bələddir. Əgər Artur müəllimin gücü tükənibsə, bundan ən çox ölkə başçısı narahat olardı. Çünki bu qarşıya qoyulan məqsədlərə çatmaq üçün görülən işlərə mane ola bilər. Deməli, baş nazirin gücü-qüvvəsi tükənməyib ki, bu gün o vəzifədədir. Əgər gələcəkdə onun bu işi davam etdirmək imkanı olarsa, güman edirəm ki, Artur Rasizadə yenə də baş nazir ola bilər. Artur müəllim şəxsən mənim Azərbaycan məmurları içərisində ən çox hörmət etdiyim məmurlardan biridir. Yenə deyirəm ki, o baş nazirlik vəzifəsindən getsə, ona can sağlığı, qalsa, gələcək fəaliyyətində uğurlar arzu edəcəm”.

Professor qeyd edib ki, nəfsinə qalib gələn və ağılla hərəkət edən insan vəzifədə olmalıdır: 

"Onun Baş nazir olub-olmayacağı isə ölkə prezidentinin səlahiyyətində olan məsələdir. Hətta, prezident onu yenidən baş nazir kimi təsdiqləsə, mən bunu alqışlayacam".