Pakistanda amerikalı diplomat qəza törətdi: Ölən var
11:19 / 09.04.2018
1637
Pakistanda ABŞ səfirliyinin əməkdaşı avtomobillə motosikleti vurub. İkitəkərli nəqliyyat vasitəsinin sürücüsü hadisə yerində ölüb, sərnişin isə ağır bədən xəsarətləri ilə xəstəxanaya yerləşdirilib.
Sfera.az xarici mətbuata istinadən bildirir ki, bu barədə Pakistan xarici siyasət idarəsinin rəsmi nümayəndəsi Məhəmməd Feysəl bildirib.
Onun sözlərinə görə, dünən gündüz saatlarında İslamabad yaxınlığında Amerika diplomatik nümayəndəliyinin hərbi-hava attaşesi idarə etdiyi avtomobili motosikletin üstünə sürüb. Motosikletin sürücüsü, yerli sakin Atik Baiq hadisə yerində dünyasını dəyişib. Onunla gedən qardaşı ağır xəsarətlərlə xəstəxanaya yerləşdirilib. Hazırda həkimlər onun həyatı uğrunda mübarizə aparırlar.
Pakistan XİN qəzanın araşdırılmasını nəzarətə götürüb. Yerli KİV-lər bildirir ki, Amerika səfirliyinin əməkdaşı diplomatik toxunulmazlığa malik olduğu üçün həbs edilməyib. Lakin ondan avtomobil və sürücülük vəsiqəsi götürülüb, bütün bunlar ABŞ diplomatik missiyasına verilib.
Faktla bağlı cinayət işi başlanıb.
Sfera.az
