Apreldə dolların qalxması ehtimalı varmı? - PROQNOZ

İqtisadçı-ekspert Rəşad Həsənov Sfera.az-a açıqlamasında seçki sonrası dollar və manatın məzənnəsi ilə bağlı proqnozlarını açıqlayıb:

 

"Son günlər ölkədə ən çox müzakirə olunan mövzulardan biri seçki sonrası manat və dolların məzənnəsinin necə dəyişəcəyi ilə bağlıdır. Bu ayın sonlarında FED-in dolların uçot dərəcəsini artırmasından sonra dünya bazarlarında müəyyən qədər dinamika müşahidə olundu. Azərbaycanda valyuta bazarlarına təsir edən əsas amillərdən biri də neftin qiymətidir. Bu günlərdə neftin qiymətində artım müşahidə olunur. Neftin bir barelinin qiyməti dövlət büdcəsində 45 dollar nəzərdə tutulmuşdu. Hazırda isə neft dövlət büdcəsində nəzərdə tutulandan təxminən 30-40 faiz baha satılır. Bu isə neft şirkətlərinin dolayısı ilə gəlirlərinin artımına, vergi ödənişi məqsədi ilə bazara çıxarılan valyutanın həcminə pozitiv təsir göstərir.  Bununla yanaşı rezervləri artırmaqla bu istiqamətdə yarana biləcək riskləri tarazlaşdırma imkanı var”.

 

Ekspertin sözlərinə görə fundamental faktorlar manatın məzənnəsində ciddi bir dəyişikliyin olacağını proqnozlaşdırmağa əsas vermir:

 

"Neft fondu 2018-ci ildən sonra bazara daha çox vəsait çıxardacağını proqnozlaşdırmaq olar. Eyni zamanda ilin əvvəli ilə müqayisədə ABŞ dollarının daha da dəyərsizləşdiyini görə bilərik. Bu da Azərbaycan manatının dollarla müqayisədə kursunun qorunmasına müsbət təsir edir. Bu kimi faktorların olduğu olduğu halda hər hansı iqtisadi riskin formalaşmasını proqnolaşdırmıram. Əsas risk neftin qiyməti ilə bağlı ola bilər”. 

Bəs, bu gün hansı amillər manat üçün risk hesab edilə bilər? Bu haqda danışan iqtisadçı iki amilin manat üçün risk yarada biləcəyini proqnozlaşdırır: 

"Bu gün  manatın məzənnəsi bazar tələb və təklifə əsasən formalaşır. Məzənnə ilə bağlı qərar siyasi yolla qəbul olunur. Bu faktor manatın gələcəyi üçün ikinci risk hesab edilə bilər. 70-80 faiz əminliklə manatın məzənnəsində ilin sonunadək heç bir dəyişikliyin baş verməyəcəyini proqnozlaşdırmaq olar”.