Bakıda yalnız bu mənzillər ucuzlaşacaq - 1-2 otaqlı evlər isə...
16:44 / 09.03.2018
4572
Dövlət Statistika Komitəsinin bu gün açıqladığı məlumata görə, ötən ayda yanvar ayı ilə müqayisədə qeyri-ərzaq malları, o cümlədən də inşaat materiallarının qiymətində azalma müşahidə olunub. Qiymətlərin aşağı düşməsi mənzil bazarında ucuzlaşmaya səbəb ola bilərmi?
İqtisadçı-ekspert Natiq Cəfərli Sfera.az-a açıqlamasında artıq bəzi mənzillərdə qiymətlərin aşağı düşdüyünü deyib:
"Yanvarla müqayisədə fevralda tikinti bazarında az da olsa, ucuzlaşmanın olması normaldır. Bu ucuzlaşma mövsümi xarakter daşıyır. Çünki qış aylarında vətəndaşlar tərəfindən təmir-tikinti işləri aparılmır. Tələbat azaldığı üçün qiymətlərdə az da olsa, enmə müşahidə edilib. Lakin qiymətlərin aşağı düşməsi tikinti bazarına dərhal təsir edə bilməz. Ucuzlaşma növbəti aylarda da davam edərsə, o zaman biz mənzil bazarında qiymətlərin aşağı düşməsini yay aylarında müşahidə edə biləcəyik. İndiki zamanda isə hələlik biz bu təsiri görə bilmərik. Çünki burada qısa zaman kəsiyindən söhbət gedir”.
N.Cəfərlinin sözlərinə görə hazırda bahalı mənzil bazarında ucuzlaşma var:
"Son 3-4 ildə bahalı mənzil bazarında kifayət qədər ucuzlaşma var. Devalvasiyadan öncəki illərdə Azərbaycanın lüks mənzil bazarında qiymətlər hətta inkişaf etmiş ölkələrdəkindən də yüksək idi. Artıq bu bazarda qiymətlər nizamlanıb. Lakin 1-2 otaqlı mənzillərdə ciddi qiymət azalması müşahidə edilməyib”.
İqtisadçının sözlərinə görə bu bazarda qiymətlərin azalmamasının əsas səbəblərindən biri də sosial mənzillərlə bağlıdır:
"Hazırda 1-2 otaqlı mənzil bazarına tələbat var. Bakının əhalisi digər şəhərlərlə müqayisədə durmadan artır. İş axtarmaq məqsədi ilə regionlardan Bakıya axınlar hələ də davam edir. Bu səbəbdən də 1-2 otaqlı mənzil bazarında ciddi dəyişiklik yoxdur. Yaxın zamanlarda bu cür mənzil bazarında qiymətlərin enəcəyini də proqnozlaşdıra bilmərik. Çünki sosial mənzil layihəsi artıq öz işinə start verib. Tələbat yüksəlsə, əksinə bu cür 1-2 otaqlı mənzil bazarında qiymətlərin daha da artmasını müşahidə edəcəyik. Lakin lüks mənzilllərdə bundan sonra da qiymətin aşağı düşməsi gözləniləndir”.
Nigar Məhərrəm
Sfera.az
