Bakıda polis əməkdaşı vuruldu
Ötən gecə paytaxtda polisin "Saxla" əmrinə tabe olmayan sürücü avtomobili ilə yol polisini vurub.
Sfera.az apa-dan aldığı məlumata görə, Bakı Şəhər Dövlət Yol Polis İdarəsinin əməkdaşı, 23 yaşlı Azad Babaşzadə xidməti vəzifəsini yerinə yetirən zaman "VAZ 2107" markalı avtomobilin sürücüsünə "Saxla" əmri verib. Əmrə tabe olmayan sürücü avtomobili yol polis əməkdaşının üstünə sürüb. Polis əməkdaşını avtomobili ilə vuran sürücü hadisə yerindən qaçıb. Xəsarətlər alan Azad Babaşzadə xəstəxanaya yol patrul avtomobili ilə gətirilib. Müayinə zamanı həkimlər onda çoxsaylı xəsarətlər müəyyən ediblər. Həkim İlham Qəmbərovun APA-ya verdiyi məlumata görə, xəstə ikinci dərəcəli travma diaqnozu ilə qəbul edilib: "Müvafiq yoxlamalardan keçib. Hal-hazırda reanimasiya şöbəsində müalicə alır. Vəziyyəti stabildir".
Polisdən verilən məlumata görə, hadisə yerindən qaçan "VAZ 2107" markalı avtomobilin yeri və sürücüsü müəyyən edilib. Sürücü saxlanılıb avtomobili isə cərimə meydançasına aparılıb.
Faktla bağlı cinayət işi açılıb, araşdırma aparılır.
