Şamaxıda kütləvi dava: Ər-arvad döyüldü
Şamaxı rayonunda kütləvi dava zamanı ər-arvad döyülüb.
Report-un məlumatına görə, hadisə rayonun Çarhan kəndində qeydə alınıb.
Kənd sakini Qulam Səftərovla xırdabuynuzlu mal-qaranı kəndin ərazisində otaran rayonun Şəhriyar qəsəbəsinin sakini Mehman Osmanov arasında mübahisə yaranıb. Səbəb isə həmin kəndin ərazisində başqa qəsəbə va ya kəndlərin sakinlərinə məxsus mal-qaranın otarılmasına kənd sakinlərinin qarşı çıxması olub. Buna görə də Çarhan kəndinin sakinləri orada heyvanları otaran çoban M.Osmanovdan mal-qaranı kəndin otlaq sahəsindən uzaqlaşdırmağı tələb ediblər.
Daha sonra mübahisəyə qoşulan Çahran kəndinin üç nəfər sakini çobanın yaşadığı evə hücum edərək onu və həyat yoldaşını döyüblər.
Müxtəlif dərəcəli bədən xəsarətləri alan ər-arvad qonşular tərəfindən Şamaxı Rayon Mərkəzi Xəstəxanasına yerləşdirilib.
Fakt Şamaxı Rayon Polis Şöbəsi tərəfindən araşdırılır.
Sfera.az
