Avtobus sürücüsünü döyən şəxs tutuldu - Video
Bakı avtobus sürücüsünü döyən şəxs saxlanılıb.
Bu barədə Sfera.az-a Daxili İşlər Nazirliyinin mətbuat xidmətinin rəis müavini Orxan Mansurzadə məlumat verib.
Onun sözlərinə görə, Nəsimi rayon Polis İdarəsinin Cinayət Axtarış Şöbəsi və 19-cu Polis Bölməsi əməkdaşlarının həyata keçirdikləri əməliyyat-axtarış tədbirləri nəticəsində avtobus sürücüsünü döyən Xırdalan şəhər sakini, 27 yaşlı Cavidan Bədəlov tutularaq sentyabrın 20-də istintaqa təhvil verilib.
Faktla bağlı Nəsimi rayon Polis İdarəsinin istintaq şöbəsində Cinayət Məcəlləsinin 221.1-ci maddəsi ilə cinayət işi başlanıb. C. Bədəlova həmin maddə üzrə ittiham elan olunub və o, təqsirləndirilən şəxs qismində istintaqa cəlb olunub.
Orxan Mansurzadə bildirib ki, həmin şəxs haqqında bu gün məhkəmə həbs qətimkan tədbirinin seçilməsi barədə təqdimata baxacaq.
Qeyd edək ki, sentyabrın 18-də axşam saatlarında metronun "Memar Əcəmi” stansiyasının yaxınlığındakı dayanacaqda 135 saylı avtobusun sürücüsü Kərimov Qüdrət Xanzalı oğlu sərnişin tərəfindən döyülüb. Hadisə nəticəsində xəsarət alan sürücü 1 saylı Şəhər Kliniki Xəstəxanasında çatdırılıb. Daşıyıcı şirkət hadisə ilə bağlı hüquq-mühafizə orqanlarına şikayət edib.
