Bu sözləri Rusiya Siyasi Araşdırmalar İnstitutunun direktoru Sergey Markov Rusiya və Qərb hərbi qüvvələrinin müntəzəm görüşləri üçün platforma kimi Azərbaycanın paytaxtının seçilməsinin səbəbləri barədə "Vestnik Kavkaza” müsahibəsi zamanı deyib.
Sergey Markov ilk növbədə Bakının görüş üçün platforma rolunu oynamasını paytaxtın möhtəşəm infrastrukturu ilə əlaqələndirib. Azərbaycanın hər iki hərbi gücə qarşı dəqiq, aydın və neytral mövqe nümayiş etdirdiyini söyləyən Markov ölkə başçısı İlham Əliyevin dahiyanə diplomatik səriştəsinin, həyata keçirdiyi balanslı siyasətin də bu seçimdə mühüm rol oynadığını vurğulayıb:
"Hətta düşmən belə olsalar, hər iki tərəf özünü Bakıda həm logistik, həm də hakimiyyətlə müxtəlif formatlı dialoqlar baxımından rahat hiss edir. Həm NATO, həm də Rusiya bilir ki, Azərbaycan məlumatları dinləmədən və informasiya sızdırmadan onlar üçün sakit, balanslı, ehtiramlı münasibət nümayiş etdirəcək”.

Sergey Markov həmçinin görüşün Azərbaycana beynəlxalq ictimaiyyətdə sülh tərəfdarı, balanslı, ehtiram göstərən və hörmət edilən tərəfdaş mövqeyi qazandırdığını bildirib.

Qeyd edək ki, Rusiya Müdafiə nazirinin birinci müavini - Silahlı Qüvvələrin Baş Qərargah rəisi, ordu generalı Valeri Gerasimov və NATO-nun Hərbi Komitəsinin sədri, general-polkovnik Petr Pavel ötən gün Azərbaycan paytaxtında görüşüblər.

Sfera.az