Aldığı mənzilə daxil ola bilmir – Çünki evi ondan xəbərsiz satılıb – VİDEO

Pul verib binadan mənzil aldı, ancaq sonradan həmin mənzilin başqasına satıldığını öyrəndi. İndi şəxs aldığı mənzilə daxil ola bilmir. Halbuki onun əlində evin alqı-satqı sənədi var. Tikinti şirkətinin məsələyə münasibətini gətiririk ekrana.

Mənzil almaq üçün 65 min manat pul verdi, ancaq indi nə pulu geri ala bilir, nə də mənzili.

Bu hadisə ilə paytaxt sakini Famil Tarquluyev qarşılaşıb. Onun sözlərinə görə, 2011-ci ildə "Xutor” adlanan ərazidə Səttar Bəhlulzadə küçəsində yerləşən tikilməkdə olan 14 mərtəbəli binanın 13-cü mərtəbəsindən mənzil alıb. Mənzili ona binanı inşa edən Zəfər adlı şəxs satıb. Elə pulu da nağd şəkildə ona verib.

Famil Tarquluyev evi alanda ona möhürlü sənəd verilib. Sənəddə pulun tam ödənildiyi və mənzilin ona məxsus olduğu qeyd edilib. Ancaq sonradan onun adına olan mənzil başqasına satılıb.

Məsələ ilə bağlı əvvəlcə mənzil alqı-satqısında adı hallanan Zəfər adlı şəxslə əlaqə saxladıq. Ancaq onun telefonuna zəng çatmadı. Sonra isə binanı inşa edən, yəni sənəddə adı və soyadı yazılan Elnur Bayramovla əlaqə saxladıq. O isə bildirdi ki, Famil Tarquluyev bu binadan ev almayıb və ona verilən sənəd tamamilə qanunsuzdur.

Yaranmış vəziyyətlə bağlı Famil Tarquluyev polisə və məhkəməyə müraciət edib.xezerxeber