Havanın keyfiyyətini öyrənə biləcəyik
Udduğumuz havanın keyfiyyəti barədə onlayn məlumat əldə edə biləcəyik.
Ekologiya və Təbii Sərvətlər Nazirliyindən Sfera.az-a verilən məlumata görə, nazirliyin internet səhifəsində (eco.gov.az) "Onlayn hava keyfiyyəti məlumatları” adlı yeni bölmə yaradılıb. Bölmədə onlayn rejimdə çalışan atmosfer havasının monitorinqi stansiyasından daxil olan məlumatların birbaşa yerləşdirilməsi və ictimaiyyət üçün açıq olması təmin edilib.
Müşahidə stansiyası vasitəsilə atmosfer havasının tərkibində olan çirkləndirici qaz qarışıqlarından - azot 4 oksid, kükürd 4 oksid, benzol, toluol, para-ksilol, ozonun səviyyəsi, dispers tozun miqdarı təyin edilir. Xüsusi proqram vasitəsi ilə daxil olan məlumatlar "Onlayn hava keyfiyyəti məlumatları” bölməsində qrafik formasında yerləşdirilir. Qrafikdə çirkləndiricilər üzrə saatlıq, dispers toz barədə isə gündəlik məlumatlar əks olunub. Bölmənin sonunda parametrlər üzrə yol verilən qatılıq hədləri cədvəl şəklində verilib.
