Əliyev-Ərdoğan görüşü: Tərəflərin məqsədi... - ŞƏRH
15:10 / 11.07.2017
1457
"Azərbaycan Prezidentinin 22-ci Dünya Neft Konqresinin işində iştirak etməsi çox mühüm bir tədbirdə Azərbaycanın əsas təbii sərvətlərindən birinin öz təcrübəsini bölüşmək idi".
Bunu Sfera.az-a açıqlamasında millət vəkili Aydın Mirzəzadə deyib.
Millət vəkilinin sözlərinə görə, İlham Əliyevin çıxışı və söylədiyi fikirlər konqresin, eləcə də dünya mətbuatının diqqətini cəlb etdi:
"Səfər çərçivəsində İ.Əliyev dost Türkiyənin rəhbəri Ərdoğanla görüşdü. Bu görüşlər artıq ənənəvi hal və xarakter daşıyır. Həm qarşılıqlı səfərlər, həm də hər iki liderin iştirak etdiyi beynəlxalq tədbirdə baş tutan görüşlər artıq bu iki prezidentin protokollarının vacib tərkib hissəsidir. Bu görüşlər iki ölkə arasında olan münasibətlərin dərinləşməsinə, birgə təşəbbüslərlə çıxış etməsinə və bir-birinin probleminə qarşılıqlı surətdə kömək etmək məqsədi daşıyır. Görüşdə tərəflər bütün aspektləri, o cümlədən həyata keçirilən əməkdaşlıq məsələlərini müzakirə etdilər. İlham Əliyevin konqresdə iştirak etməsi və onun vacib dövlət xadimləri ilə görüşü Azərbaycanın təcrübəsinin bəyan edilməsinə və mövqeyinin dünya birliyinə çatdırılmasına, eyni zamanda dünyada gedən proseslər barəsində Azərbaycanın mövqeyinin bir daha çatdırılmasında böyük rol oynayır. Azərbaycan Türkiyəyə xüsusi münasibət bəsləyir. Bu münasibətlərə ən yüksək səviyyədə böyük diqqət yetirilir və qardaş ölkə ilə münasibətlərin dərinləşməsi daim İlham Əliyevin diqqətindədir".
Qeyd edək ki, İstanbulun ev sahibliyi etdiyi 22-ci Dünya Neft Konqresinin işində iştirak etmək üçün Prezident İlham Əliyev Türkiyəyə səfər edib. Səfər çərçivəsində İlham Əliyev Türkiyə Prezidenti Ərdoğan və ABŞ Dövlət katibi Tillerson da daxil olmaqla, bir sıra görüşlər keçirib.
Çinarə Məmmədova
Sfera.az
