Bankların böyük əksəriyyəti oliqarx-məmurların pul kisəsi rolunu oynayır... - İDDİA
15:15 / 16.06.2017
1625
Beynəlxalq investor və reytinq xidməti Moody’s Azərbaycanın dörd bankının reytinqini aşağı salıb və göstəricilərinin pisləşdiyi barədə xəbərdarlıq edib: "Xalq Bank”, "Bank Respublika”, "Bank of Baku” və "Bank VTB Azərbaycan”.
Agentlik hər dörd bankın yerli və xarici valyuta üzrə uzunmüddətli depozit reytinqi perspektivlərinin neqativ olduğunu, problemli kreditlərin artdığını, hətta 25%-ə çatdığını qeyd edib. İddia edilir ki, "Bank Respublika" MB-ın rəhbəri Elman Rüstəmova məxsusdur, yəni baş bankirin öz bankında belə vəziyyət yaxşı deyil.
Məsələni Sfera.az-a şərh edən iqtisadçı ekspert Akif Nəsirli bildirib ki, Azərbaycanda bank sisteminin bərbad vəziyyətdə olduğu heç kimə sirr deyil.
Ekspertin sözlərinə görə, bu vəziyyəti beynəlxalq standartlarla qiymətləndirdikdə mənzərə daha neqativ görünür:
"Düşünmürəm ki, yalnız bu bankların vəziyyəti beynəlxalq standartlara uyğun gəlmir, belə banklarımızın sayı daha çoxdur. Yəqin ki, ilin sonuna doğru, digərlərinin də adı açıqlanacaq. Sadəcə beynəlxalq reytinq təşkilatlarının bizim bank-maliyyə resurslarına çıxışları məhdud olduğundan dəqiq qiymətləndirmə apara bilmirlər. Çox güman ki, bu yaxınlarda adları açıqlanmadan nəzarətə götürülməli banklardan bir neçəsi bu siyahıda var. Lakin çox təəssüflər olsun ki, banklara konseldasiya təklif ediləndə və ya lisenziyası ləğv ediləndə problemə vahid standartlardan yanaşılmır. Yaxşı olardı hökumətin maliyyə siyasətini həyata keçirən qurumlar banklara qarşı dəqiq və standart tələblər irəli sürələr və bu standartlara cavab verməyən bankların ya lisenziyaları alınsın və ya birləşməsi təklif edilsin. Belə olsa bank sistemi daha tez sağlamlaşar. Yoxsa ki, məsələn, hansısa bank baş və ya başqa məmura bankerə yaxındı deyə ona güzəşt edilirsə, bu səmərəli sağlamlaşdırma olmayacaq. Bankların kimə məxsus olmasına gəldikdə isə bizim bankların böyük əksəriyyəti oliqarx-məmurların pul kisəsi rolunu oynayır. Onlar sadəcə olaraq həm də sələmə pul verir. Bankların dünyada yüzə yaxın aləti mövcuddur. Azərbaycanda bunun bir neçəsi işləyir. Müasir dünyada bu bankçılıq sayılmır. Bunun adı sələmçilikdir".
Natiq Cəfərli bildirib ki, ümumilikdə bütün bank sistemində stresli vəziyyət yaranıb:
"Bankların problemli kreditlərin həcmi artır, banklar yenidən kreditlər verə bilmir, vətəndaş-bank qarşıdurması artır, onminlərlə vətəndaşı banklar məhkəmələrə verirlər. Məhkəmə yolu isə effektiv deyil, bu addımlar kreditlərin qaytarılmasına heç bir kömək etməyəcək. Sonuc etibarı ilə iqtisadiyyatın "qan-damar” sistemi olan bank sektorunda vəziyyət düzəlməsə, sağlamlaşma addımları olmasa, iqtisadi aktivlik də artmayacaq, vətəndaşların gəlirləri azalacaq. Bu sahədə vəziyyəti düzəltmək üçün Mərkəzi Bank və hökumət ciddi tədbirlər görməlidir. Banklara dövlət dəstəyi olmasa, vəziyyətdən çıxa bilməyəcəklər. Vətəndaşlara isə kreditlərlə bağlı dəstək olmasa, onlar da kreditlərini ödəyə bilməyəcəklər – beləcə bankların problemli kreditləri idarəolunmaz həddlərə çatacaq".
Gülnarə Eynullaqızı
Sfera.az
