Azərbaycanda fəaliyyət göstərən bəzi kommersiya bankları sahibkarlar üçün nəzərdə tutulmuş plastik kartlardan nağdlaşdırmanı dayandırıb. Bu addım Maliyyə Bazarlarına Nəzarət Palatasının tövsiyəsi əsasında atılıb. Belə ki, bu günlərdə Palatadan banklara zəng edilib və şifahi şəkildə biznes kartlarından nağdlaşdırmanın dayandırılması tövsiyə olunub. Bu, "Nağdsız hesablaşmalar haqqında” qanunun icrasından irəli gəlir.

Məsələni Sfera.az-a şərh edən iqtisadçı-ekspert  Qadir İbrahimli söyləyib ki, Maliyyə Bazarlarına Nəzarət Palatasının banklara hər hansı bir administrativ qaydada göstəriş vermək hüququ yoxdur:

"Banklara yalnız tövsiyyə edə bilər və bu tövsiyyə də məcburi xarakter daşımır. Ümumiyyətlə, son vaxtlar Palatanın banklara qeyri-rəsmi inzibati müdaxilələri çox olur. Bu da bank sektorları üçün heç də yaxşı vədlər vermir. Nağdsız əməliyyatlar və vəsaitlər hansısa mərhələdə nağdlaşdırılmalıdır. Vəsaitlər sonsuza qədər hesabda qala bilməz. Palata ölkədəki maliyyə axınını tam nəzarətdə saxlamaq istəyir, bu da mümkün deyil. Əksinə biznes mülkündə problemlərin yaranmasına səbəb olur. Burada düzgün dəyərləndirmə yoxdur, qeyri-müəyyənlik var. Yaxşı olardı ki, Palata tövsiyyəsinə yenidən baxsın”.

İqtisadçı-ekspert Qalib Toğrul hesab edir ki, bu doğru yanaşma deyil, çünki sahibkarların hüquqlarını məhdudlaşdırır:

"Həm "Nağdsız hesablaşmalar haqqında” qanuna uyğun olaraq, həm də vergi məcəlləsinə bu illər də edilmiş dəyişikliklərə görə, sahibkar dövriyyəsindən asılı olmayaraq 15-30 min manat arası aylıq nağdsız əməliyyat apara bilər. Hesab edirəm ki, belə bir məhdudiyyət qoyulubsa, bunun aradan qaldırılması üçün müvafiq qaydaya əsasən tədbirlər görülməlidir. Onsuzda "Nağdsız hesablaşmalar haqqında” qanunun tətbiqi sahibkarlar üçün çox böyük problemlər yaradıb. Çünki ölkədə nağdsız hesablaşmalarla bağlı münbit və sağlam bank maliyyə sisteminin olmadığı üçün sahibkarlar əziyyət çəkirlər".

Xatırladaq ki, yeni qanunla əlaqədar bir qədər əvvəl iş adamlarının cari hesablarından vəsait çıxarılmasına limit qoyulub.

Gülnarə Eynullaqızı

Sfera.az