Kanadalı aktyor Peter Helm 84 yaşında ABŞ-nin Vest Hills şəhərindəki evində yuxuda dünyasını dəyişib. Bu barədə onun yaxın dostu Devid Timmerman məlumat verib.

Sfera.az xəbər verir ki, 1960-cı illərdə Amerika televiziyasının tanınmış simalarından birinə çevrilən Helm “The Mystery of Andromeda” (Andromeda Sirri) filmi ilə yadda qalıb. O, karyerası ərzində “Doctor Kildare”, “Bonanza”, “Perry Mason”, “Rawhide”, “Ironside” və “El fugitivo” kimi məşhur seriallarda müxtəlif rollar ifa edib.

22 dekabr 1941-ci ildə Kanadanın Toronto şəhərində anadan olan aktyor uşaqlıqdan incəsənət mühitində böyüyüb. 1950-ci illərin sonlarında televiziyada debüt edən Helm qısa zamanda “sadəlövh gənc” və əsgər rolları ilə tanınıb.

1962-ci ildə “The Longest Day” filmi ilə kinoya qədəm qoyan aktyor daha sonra Natali Vudla birlikdə “The Rebel” filmində də rol alıb. 1970-ci illərdə isə onun ən yaddaqalan işlərindən biri “The Mystery of Andromeda” olub.

Helm 1971-ci ildən sonra aktyorluq fəaliyyətini tədricən dayandıraraq prodüserlik və təhsil sahəsinə yönəlib. 1991-ci ildə Vankuverdə “GeoMediapro” şirkətini təsis edib və Vankuver Kino Məktəbində dərs deyib.

Şəxsi həyatına gəlincə, aktyor 1962–1966-cı illərdə aktrisa Bruk Bandi ilə evli olub və bu evlilikdən qızı Tiffani Helm dünyaya gəlib. O, həmçinin Brandee adlı qızı və yeddi nəvəsi ilə ailə həyatı yaşayıb. Oğlu Dastin isə 2014-cü ildə vəfat edib.

Peter Helm həmçinin aviasiya, fotoqrafiya və avtomobil dünyasına marağı ilə tanınıb və Los-Ancelesdə Ferrari klubunun qurucularından biri olub.

Mənsumə
Sfera.az

Tanınmış aktyor dünyasını dəyişdi