Bakıdakı “İdrak” liseyində silahlı insident baş verib.

Sfera.az Unikal-a istinadən xəbər verir ki, hadisə Binəqədi rayonu ərazisindəki təhsil müəssisəsində qeydə alınıb.

Bildirilib ki, 10-cu sinif şagirdi müəllimə silahdan atəş açıb.

Dərhal xəstəxanaya çatdırılan müəllimin vəziyyətinin ağır olduğu bildirilir.

Liseyin rəhbəri Mönsüm Alışov hadisənin ehtiyatsızlıqdan baş verdiyini deyib: “Şagird ov tüfəngini liseyə məktəb çantasında gətirib. Hadisə ehtiyatsızlıqdan baş verib”.

***

Liseyin rəhbəri Mönsüm Alışov “Yeni Sabah”a açıqlamasında bildirib ki, əvvəllər bu şagirdlə bağlı şikayət olmayıb: “Davranışları normal olub. Hadisə sinif otağında baş verib. Müəllimin vəziyyəti yaxşıdır, xəstəxanadadır”.

***

Xəsarət alan müəllim (qadın-red.) Kliniki Tibbi Mərkəzə (KTM) yerləşdirilib.

***

Bu gün paytaxtın Binəqədi rayonu Ziya Bünyadov prospektində yerləşən “İdrak” liseyində 29 yaşlı xanım müəllimi güllələyən şagirdlə bağlı bəzi faktlar üzə çıxıb.

Sfera.az bildirir ki, “Qafqazinfo”nun əldə etdiyi məlumata görə, cinayətdə şübhəli bilinən şagirdin atası Samir Şirinov daha əvvəl Sumqayıt Şəhər İcra Hakimiyyətinin Mənzil Kommunal Təsərrüfat Birliyində rəis müavini vəzifəsində çalışıb.

Onun hazırda işsiz olduğu bildirilir.

Yeniyetmə saxlanılıb. Faktla bağlı araşdırmalar davam etdirilir.

“İdrak” liseyində şagird müəllimi güllələdi- Direktordan açıqlama- Yenilənib