1a:T7ed,

Son dövrlər bankların debet kartlar üzrə komissiyasız əməliyyat limitlərini azaltması müştərilər arasında narazılıq doğurub. Belə ki, artıq əksər banklarda ay ərzində ödəniş terminalları vasitəsilə komissiyasız əməliyyatların məbləği 1000 manatla, “card to card” köçürmələr üzrə isə 2000 manatla məhdudlaşdırılıb. Müəyyən olunmuş limiti aşan vətəndaşlar hər əməliyyat üçün 0,5-1 faiz komissiya haqqı ödəməli olurlar. Bankların bu addımı atmasının səbəbi isə maraq doğurur.

Mövzu ilə bağlı Sfera.az-a açıqlama verən hüquqşünas Əkrəm Həsənov kartlarla bəzi əməliyyatlara güzəşt limitinin azaldılmasını plastik kartlardan istifadə həcminin artması ilə əlaqələndirdi:

“İstənilən kommersiya təşkilatı göstərdiyi xidmətin qarşılığında gəlir əldə etməlidir. Bankın xərcləri var, vaxt sərf olunur, işçilər çalışır, texnoloji sistemlər qurulur. İndiyə qədər bəzi xidmətlərin pulsuz olmasının əsas səbəbi bankların müştəri cəlb etməyə çalışması idi. Əvvəllər banklar əsas gəlirlərini kreditlərdən əldə edirdilər. Son illərdə kredit faizlərinin qismən azalması bu mənbədən gəlirləri azaldıb və banklar da digər xidmətlər üzrə ödəniş tətbiq etməyə başlayıblar. Avropa banklarında isə pulsuz xidmət anlayışı demək olar ki, yoxdur. Bu addım tamamilə normaldır”.

Qeyd edək ki, bankların tətbiq etdiyi yeni limitlər və komissiya haqları bankdan banka dəyişə bilər və müştərilərə tövsiyə olunur ki, istifadə etdikləri bankın tarif şərtləri ilə əvvəlcədən tanış olsunlar.

Firuzə Əliyeva
Sfera.az

Banklar güzəştləri azaldır: "Təşkilatlar gəlir əldə etməlidir"