\"Ağdamda heç kim evini tərk etməyib\" - İcra başçısı

Son günlər təmas xəttində erməni təxribatları intensivləşib. Demək olar ki, hər gün mövqelərimiz, cəbhəboyu kəndlər aramsız atəşə tutulur.

Ötən gün sosial şəbəkələrdə cəbhədə qızğın döyüşlərin getməsi haqda müxtəlif məlumatlar yayılmışdı. İstifadəçilərin yazdığına görə, düşmənin Ağdamın kəndlərini iriçaplı silahlarla atəşə tutması yerli sakinlər arasında təşvişə səbəb olub. 

Sfera.az xəbər verir ki, Ağdam Rayon İcra Hakimiyyətinin başçısı Raqub Məmmədov azvision.az-a bildirib ki, hazırda rayon ərazisində sakitlikdir, heç bir problem yoxdur. 

"İnsanları panikaya salmaq lazım deyil. Ağdamda vəziyyət qaydasındadır. Heç kim evini tərk etməyib. Hamı əvvəlki günlərdə olduğu kimi öz həyatını yaşayır. Bütün idarə, müəssisələr işləyir. Rayonda vəziyyət normaldır, şayiələrə inanmaq lazım deyil. İnsanların əhval-ruhiyyəsi yüksəkdir. Heç bir qorxu, təlaş yoxdur".