\"Lapşinin müdafiəsi ilə yeni vəkil məşğul olacaq\"
Azərbaycanda həbsdə olan bloger Aleksandr Lapşin üçün yeni vəkil tutulub.
Sfera.az xəbər verir ki, Rusiyanın Azərbaycandakı səfirliyinin mətbuat katibi Denis Apaşkinin APA-ya verdiyi məlumata görə, A.Lapşinin müdafiəsi ilə bundan sonra onun ailəsi tərəfindən tutulmuş vəkil məşğul olacaq.
O, həmçinin bildirib ki, blogerlə yenidən görüşmək üçün müvafiq qurumlara müraciət edilib: "Müvafiq razılıq əldə olunduqdan sonra onunla yenidən görüşəcəyik".
Qeyd edək ki, Azərbaycan Baş Prokurorluğunun Ağır Cinayətlərə dair İşlər üzrə İstintaq İdarəsində istintaqı aparılan cinayət işi üzrə ayrı-ayrı dövlətlərin vətəndaşlığını daşıyan Aleksandr Lapşin Azərbaycanın dövlət sərhədini qanunsuz olaraq keçmə, ərazi bütövlüyünü parçalamağa yönələn açıq çağırışlar etmə əməllərinə görə təqsirləndirilən şəxs qismində cəlb edilib beynəlxalq və dövlətlərarası axtarışa verilməsi ilə əlaqədar 2016-cı il dekabrın 15-də Belarus Respublikasının hüquq-mühafizə orqanları tərəfindən Minskdə saxlanılaraq, 2017-ci il fevralın 7-də Azərbaycan Respublikasına ekstradisiya edilib.
