"ABŞ-lə diplomatik yol tam bağlanmayıb" - Əraqçi
“Vaşinqton hərbi təhdid siyasətinə son qoymayınca Tehran ilə ABŞ arasında nüvə danışıqları davam etdirilməyəcək”.
Sfera.az “Mehr” agentliyinə istinadən xəbər verir ki, bu sözləri İranın xarici işlər naziri Abbas Əraqçi ABŞ-nin CBS telekanalına müsahibəsində bildirib.
“Danışıqların bərpa edilib-edilməməsinə qərar vermək üçün ilk növbədə Vaşinqtonun danışıqlardan yenidən hərbi təcavüz üçün istifadə etməyəcəyinə əmin olmalıyıq”,- deyə Əraqçi vurğulayıb.
O, diplomatiya yollarının tamamilə bağlanmadığını da qeyd edib. Nazir müsahibəsində həmçinin İranın uranı zənginləşdirmə fəaliyyətinə toxunub və bu sahəni “inkişaf etmiş, elmə əsaslanan sənaye” adlandırıb.
O deyib ki, əgər bu sənaye zədələnərsə və ya məhv olarsa, İran yaranan ziyanı qısa zamanda aradan qaldırmaq və texnoloji irəliləyişi davam etdirmək gücünə malikdir. Əraqçi İranın sülhməramlı nüvə proqramını milli qürur və ləyaqət mənbəyi kimi dəyərləndirərək, bu sahədən asanlıqla geri çəkilməyəcəklərini bildirib:
“Ölkəmizin sülhməramlı nüvə proqramı milli qürur və ləyaqət mənbəyinə çevrilib. İran 12 günlük tətbiq olunan müharibədən keçib. Buna görə də İran xalqı zənginləşdirmədən asanlıqla geri çəkilməyəcək”.
Nazir sonda qeyd edib ki, İran müharibə dövründə öz gücünü və müdafiə iradəsini nümayiş etdirib və mümkün hərbi təcavüz halında bu iradəni yenidən göstərəcəyini bəyan edib.
Fidan Hacızadə
Sfera.az
