Ali məktəblərə qəbul qaydaları DƏYİŞDİRİLİR

Təhsil Nazirliyi hökumətə ali təhsil müəssisələrinə qəbul olan tələbələrin sayının artırılmasına dair təkliflər təqdim edib.

Sfera.az Trend-ə istinadən bildirir ki, bunu jurnalistlərə açıqlamasında təhsil naziri Mikayıl Cabbarov deyib.

Nazir qeyd edib ki, Təhsil Nazirliyinə ali təhsil müəssisələri tərəfindən edilən müraciətlər əsasında hökumətə bu il ali təhsil sistemində hazırlıq ilinin tədbiqi şərti ilə ali təhsil müəssisələrinə qəbulun genişləndirilməsinə, yəni qəbul olan tələbələrin sayının artırılmasına dair təkliflər təqdim olunub. Hazırda həmin təklifə hökumətdə baxılır.

M.Cabbarov əlavə edilib ki, bu dəyişiklik qəbul olunduğu təqdirdə Azərbaycanda ali təhsil səviyyəsinə qəbul olan tələbələrin sayı nisbətən artacaq və yüksək akademik nailiyyətlər göstərən tələbələr öz tədrisinə dərhal başlaya biləcəklər:

"Amma zəruri bilik səviyyəsi nümayiş etdirə bilməyən, lakin ali təhsilə meyilli olan, ali təhsil almaq istəyən tələbələr bir sra ixtisaslar üzrə ali məktəblərin nəzdində xüsusi hazırlıq kursları keçdikdən sonra ali təhsilə başlaya biləcəklər".