Bakıda dənizdə körpü, nəqliyyat sistemi qurulacaq? - AÇIQLAMA

Son illərdə Bakıda sürətlə artan avtomobil sayı, yol infrastrukturu üzərində böyük yük yaradaraq paytaxtda nəqliyyat sıxlığını daha da kəskinləşdirib. Xüsusilə pik saatlarda uzun tıxaclar həm insanların vaxt itkisinə, həm də iqtisadi zərərlərə səbəb olur.

Bakıda İstanbul nümunəsində dəniz nəqliyyatı yaradıla bilərmi?(Bayıl, Bibiheybət, Əzizbəyov, Şıxlar, Zığ). Yaradılarsa, bu, tıxacı azaldacaqmı? Bu addımın atılması üçün nə tələb olunur?

Mövcud suallarla bağlı Sfera.az-a açıqlama verən nəqliyyat eksperti Elməddin Muradlı praktik baxımdan bu halın mümkün görünmədiyini bildirib:

“Çünki Xəzər dənizində su taksilərinin fəaliyyəti rentabelli deyil. İnsanların buna marağı yalnız müəyyən bir dövr üçün ola bilər. Sonrakı mərhələlərdə isə həmin xidmət üçün tələb olunan məbləği ödəyərək səyahət etmək istəməyəcəklər”.

Ekspert sərhədlər açılandan və turizm potensialı daha da genişləndikdən sonra bu məsələyə turistik layihə kimi baxmağın mümkün olduğunu əlavə edib. O qeyd edib ki, ictimai nəqliyyat növü kimi insanları dənizin bir sahilindən digərinə daşınması real görünmür:

“Bunun əsas səbəbi maddi baxımdan səmərəsiz olmasıdır. Üstəlik, Xəzər dənizi küləkli dənizdir və hava şəraiti daim əlverişli olmur ki, müntəzəm səfərlərə imkan versin”.

Fidan Hacızadə

Sfera.az