Mikayıl Cabbarov: "Ali təhsil sistemi artıq təsərrüfat əsaslı fəaliyyət göstərən sistemdir"

"Ali təhsil sistemi artıq bir neçə ildir ki, təsərrüfat əsaslı fəaliyyət göstərən sistemdir. Dövlət mülkiyyətləri üçün bu, kifayət qədər mütərəqqi bir modeldir".

Sfera.az Trend-ə istinadən xəbər verir ki, bunu təhsil naziri Mikayıl Cabbarov "Maarifçi" Tələbə Kredit Fondu, Təhsil Nazirliyi və Dünya Bankı ilə birlikdə "Maarifçi" Tələbə Kredit Fondunun fəaliyyəti və Azərbaycanda tələbə kreditləri proqramı" mövzusunda keçirilən tədbirdə deyib.

Nazir əlavə edib ki, dövlət ali təhsil müəssisələrində maliyyələşmə adambaşına maliyyələşdirmə sistemi ilə qurulur. Dövlət sifarişi ilə təhsil alanların xərclərini dövlət ödəyir: "Dövlətlə ali təhsil müəssisələri arasında münasibət adambaşına maliyyələşdirmə münasibəti əsasında qurulub. Dövlət mərkəzləşdirilmiş imtahanda yüksək bal yığan, dövlət sifarişi ilə qəbul olunan tələbələrin təhsil alma xərclərini ödəyir".

M.Cabbarov bildirib ki, dövlət ali məktəbləri mövcud olan büdcə vəsaitlərinin 80-82%-ni əmək haqlarına sərf edirlər.

Nazirin sözlərinə görə, son 5 ildə ali məktəblərin qarşısında belə bir məqsəd dayanıb ki, onlar öz büdcələri ilə davamlı inkişaflarını təmin etsinlər.

M.Cabbarov əlavə edib ki, son 3,5 il ərzində Təhsil Nazirliyinin ali təhsil müəssisələri ilə uğurlu fəaliyyət nəticəsində bir sıra səmərəli layihələr həyata keçirilib. Onun sözlərinə görə, bu il ali məktəblərdə yaradılan SABAH qruplarının ilk məzunları olacaq.